“Rusiya Azərbaycandan asılıdır” – Politoloq elə danışdı ki...

"Kremlin ətrafında formalaşan bəzi dairələrin söylədikləri əhəmiyyət daşımır. Mövcud geosiyasi reallıqda Rusiya Azərbaycandan asılıdır". 

Politoloq Yusif Bağırzadə bunu TodayPress TV-yə danışarkən bildirib.

Onun sözlərinə görə, Prezident İlham Əliyevin yerli və beynəlxalq media orqanlarına verdiyi hər bir müsahibə və açıqlama dünya ictimaiyyətində müsbət mənada geniş rezonans doğurur. Çünki cənab Prezident hər zaman beynəlxalq hüquqa əsaslanan, tarixi faktlara söykənən fikirlər səsləndirir. Bu dəfə də “Əl-Ərəbiyyə” telekanalına verdiyi geniş müsahibədə Azərbaycanın dövlət müstəqilliyi ilə bağlı baş verən tarixi hadisələri ardıcıl şəkildə diqqətə çatdırıb.

“1918-1920-ci illərdə baş verən hadisələr, bolşeviklərin Azərbaycanı işğal etməsi, eləcə də 1921-ci ildə Zəngəzur dəhlizinin qeyri-qanuni şəkildə Ermənistana verilməsi sənədlərlə sübuta yetirilmiş tarixi faktlardır. Həmin dövrdə Azərbaycanın ərazi bütövlüyünə qarşı açıq şəkildə pozuntular olub. Belovej razılaşmasının imzalandığı 1990-cı illərin əvvəllərində isə artıq SSRİ-nin qeyri-legitim qurum olduğu bir daha təsdiqləndi. Azərbaycan bu müstəqilliyi xalqının qanı və şəhidlərin fədakarlığı ilə əldə edib.  

Prezident İlham Əliyevin isə bu tarixi faktları səsləndirməsi həm də Rusiyaya bir mesajdır. İstər Çar Rusiyası dövründə, istərsə də Sovet İttifaqı zamanında Azərbaycan torpaqları qeyri-qanuni formada ya Rusiyaya, ya da Ermənistana verilib. Azərbaycanın iki yerə bölünməsinin əsas səbəbkarı da məhz Kremldir. Bunu inkar etmək mümkün deyil”.

Analitik vurğulayıb ki, Zəngəzur dəhlizinin 1921-ci ildə Ermənistana verilməsi də sənədlərlə sübuta yetirilmiş tarixi faktdır. Rusiya-Azərbaycan münasibətləri isə gün keçdikcə gərginləşir. Xüsusilə də Azərbaycanın təyyarəsinin vurulması və mülki vətəndaşlara ziyan dəyməsi faktlarına görə, Rusiya əvvəllər bizim ödədiyimiz kimi təzminat ödəməlidir.

"2023-cü ilin dekabrında rəsmi Tehranla Moskva arasında imzalanan böyük iqtisadi strateji müttəfiqlik sazişindən sonra Rusiya qazının İrana çatdırılması Azərbaycan vasitəsilə həyata keçirilib. Həmçinin, Şimal-Cənub nəqliyyat dəhlizində Azərbaycan həlledici rol oynayır. Buna görə də Rusiyanın Azərbaycandan üzr istəməsi zəruridir. Bu həm hüquqi, həm də siyasi reallıqdır", - deyə Y.Bağırzadə fikrini yekunlaşdırıb.

Qeyd edək ki, Prezident İlham Əliyevin “Əl-Ərəbiyyə” telekanalına müsahibəsində səsləndirdiyi “1920-ci ilin aprelində rus ordusu Azərbaycana daxil olub onu işğal etdi” fikri Rusiya ictimai-siyasi mühitində geniş müzakirələrə səbəb olub. 

Hələ ötən ay ölkə başçısının III Şuşa Qlobal Media Forumunun iştirakçıları ilə görüşündə ukraynalı jurnalist Dmitri Qordonun sualına cavab olaraq “işğalla heç zaman barışmayın” deməsi də Rusiya mediasında geniş yayılmış, bir sıra dairələr tərəfindən etirazla qarşılanmışdı. 

Azərbaycan Prezidentinin ardıcıl və açıq mesajları Rusiyanın siyasi və media elitasını ciddi silkələməyə davam edir.

Aysel Mətləb