Ruhanilər Paşinyana qarşı: Kim qalib gələcək?
Ermənistan mətbuatının yazdığına görə, baş nazir Nikol Paşinyan hökumət iclasından sonra aparat rəhbəri Araik Arutyunyanla kilsə məsələsi ilə bağlı gərgin söhbət aparıb. “İravunk” qəzeti Paşinyanın kilsəyə qarşı kampaniyanın nəticəsiz qalmasından narazı olduğunu iddia edir. Qeyd olunur ki, məlumat Paşinyana müxalif mövqeyi ilə tanınan nəşrə aiddir.
Maraqlıdır, bu qalmaqal hakimiyyət–kilsə münasibətlərində hansı yeni mərhələnin başlandığını göstərə bilər?
Sözügedən məsələ ilə bağlı TodayPress TV-yə danışan politoloq Məhəmməd Əsədullazadə bildirib ki, Paşinyan İkinci Qaregini vəzifədən kənarlaşdıra bilmir:
"Ermənistan baş naziri Nikol Paşinyan İkinci Qaregini hələ də vəzifəsindən kənarlaşdıra bilmir. Edilən təzyiqlər demək olar ki, nəticəsiz qalır. Hətta yepiskop və arxiyepiskopların etirazları da hər hansı müsbət nəticə verməyib. Təbii ki, Paşinyan komandasına tapşırıb ki, bu prosesləri idarə etsin, İkinci Qareginə qarşı kompromatlar toplansın və təzyiqlər nəticə versin. Buna görə ola bilər ki, aparat rəhbərini danlayıb".
Analitik qeyd edib ki, Paşinyan İkinci Qareginin gücünü zəiflətmək üçün təzyiq göstərir:
"Seçkilərə az qaldığı üçün proses dalana dirənib və kilsəyə, xüsusilə İkinci Qareginin ətrafına ciddi təzyiqlər göstərilməlidir. Onun yanında olanlar neytrallaşdırılmalı və bu, hakimiyyətin müxtəlif qolları, xüsusilə aparat tərəfindən həyata keçirilməlidir. Bu vəziyyət Paşinyanı narazı salır, çünki Qaregin vəzifədə qaldıqca mövqeyi güclənir və dirənişini artırır".
Onun sözlərinə görə, Paşinyan öz gücünü göstərməyi hədəfləyir:
"Hesab edirəm ki, Paşinyan konkret qərarlar qəbul edəcək və İkinci Qaregini vəzifəsindən azad edəcək. Çünki İkinci Apostol kilsəsində Qareginin fəaliyyəti və bu mübarizədə onun qələbəsi seçkilərdə Paşinyanın nüfuzuna zərbə vuraraq reytinqini zəiflədə bilər. İkinci Qaregini vəzifədən uzaqlaşdırmaqla Paşinyan həm xalqa öz gücünü nümayiş etdirmək, həm də Qaregini məğlub etdiyini göstərmək istəyir. Eyni zamanda, Qaregin barədə mənfi məlumatlar xalqa çatdırılır. Beləliklə, proses bu istiqamətdə davam edir və Paşinyanın istəyinə nail olacağı ehtimal olunur".
Jalə Rövşən
Jalə Rövşən
