Paşinyanın qələbəsi regionun gələcəyinə nə vəd edir? - Nəzərə alsaq ki, artıq güclənir, silahlanır və 6 il əvvəlki deyil
Seçki nəticələri ilə , Ermənistanda uzunmüddətli strateji yol xəritəsinin təsdiqi baş verdi.
Paşinyanın “Vətəndaş Müqaviləsi” partiyasının qələbəsi, Ermənistanın 2020-ci ildən bəri keçdiyi sancılı transformasiyanın kulminasiyasıdır. Artıq 6 il əvvəlin "zəif" lideri yox, daha ciddi, silahlanmasını diversifikasiya etmiş və Qərbə doğru strateji pivot etmiş bir Ermənistanla üz-üzəyik.
Bu gün Ermənistanın müdafiə büdcəsinin 1,7 milyard dollara çatması və Rusiyadan asılılığın azalaraq Hindistan və Fransa kimi yeni tərəfdaşlarla əvəzlənməsi, regiondakı köhnə balansın dağıldığını göstərir.
Paşinyan hələlik Avrasiya İqtisadi İttifaqından dərhal ayrılmaq kimi iqtisadi cəhətdən intihar xarakteri daşıyan addımdan çəkinsə də, Aİ-yə üzvlük hədəfini açıq elan edib. Rusiya ilə münasibətlər isə artıq tarixi "təhlükəsizlik zəmanəti" mərhələsindən çıxaraq, soyuq və etimadsız bir "məcburi praqmatizm" müstəvisinə keçib. KTMT-dəki iştirakın dondurulması və Gümrü bazası ətrafındakı suallar, Moskvanın Cənubi Qafqazdakı təsir imkanlarının ciddi şəkildə daraldığını göstərir. Seçkidən sonrakı mərhələ hər iki tərəf üçün həlledici ola bilər.
Azərbaycan-Ermənistan münasibətləri kontekstində qələbə, paradoksal olsa da, sülh danışıqlarının davamı üçün müəyyən bir sabitlik pəncərəsi açacaq. Paşinyanın daxili revanşist qüvvələr üzərindəki legitim gücü, onun sülh müqaviləsi və delimitasiya kimi ağır qərarları qəbul etməsini asanlaşdıra bilər. Lakin hərbi güclənmə tendensiyası yeni bir silahlanma yarışını körükləmək riski də daşıyır.
Regionumuz artıq Rusiyanın təkbaşına oyun qaydalarını müəyyən etdiyi bir məkan olmaqdan çıxır. Qərbin, Türkiyənin və digər regional aktorların artan təsiri fonunda Cənubi Qafqaz daha çoxvektorlu, dinamik və eyni zamanda kövrək bir reallığa qədəm qoyur. Paşinyanın qələbəsi Ermənistanın Qərbə inteqrasiyasını geri dönməz bir nöqtəyə gətirib çıxarır və bu, regiondakı mövcud qüvvələr nisbətində yeni bir eranın başlanğıcıdır.
Jalə Rövşən
