Əbu-Dabidən dünyaya MESAJ: Azərbaycan SÜLHÜ MÖHÜRLƏDİ!
“Prezident İlham Əliyevin Əbu-Dabidə “Zayed İnsan Qardaşlığı Mükafatı”nın təqdimolunma mərasimindəki çıxışı Azərbaycanın postmünaqişə dövründə formalaşdırdığı yeni xarici siyasət narrativinin sistemli təqdimatı idi”.
Politoloq Yusif Bağırzadə bunu ölkə başçısının çıxışını TodayPress TV-yə şərh edərkən deyib.
Onun sözlərinə görə, Azərbaycan Prezidenti burada BƏƏ-ni təkcə dost ölkə kimi deyil, müasirliklə ənənəni uzlaşdıran uğurlu dövlət modeli kimi təqdim edib və Azərbaycanın da regionda məhz belə bir model qurmaq niyyətində olduğuna dair dolayı mesaj verib:
“Çıxışın əsas ağırlıq mərkəzi, təbii ki, Azərbaycan–Ermənistan sülh prosesi ilə bağlı idi. Prezidentin “biz sülh şəraitində yaşamağı öyrənirik” fikri müharibədən sonrakı dövrün psixoloji və institusional transformasiya mərhələsi kimi təqdim edilməsi baxımından olduqca mühüm ifadədir. Bu yanaşma ilə ölkə başçısı həm daxili auditoriyaya, həm də beynəlxalq ictimaiyyətə sülhün artıq taktiki fasilə yox, strateji seçim olduğuna dair konkret mesaj ötürmüş oldu”.
Ekpsert, həmçinin bildirib ki, Prezidentin Vaşinqtondakı Zirvə Görüşünü xüsusi vurğulaması və ABŞ Prezidenti Donald Trampa açıq minnətdarlıq ifadə etməsi isə ölkəmizin ABŞ-ni sülh prosesində əsas qlobal zəmanətçi kimi tanıdığını göstərir:
“Burada diqqətçəkən məqam ondan ibarətdir ki, Vaşinqton prosesi hərbi-siyasi deyil, diplomatik qələbə kimi təqdim olunur. Bu isə Azərbaycanın beynəlxalq imicini güc tətbiq edən deyil, nəticə əldə edən tərəf kimi möhkəmləndirir.
Analitik çıxışda digər vacib məqamın iqtisadi əməkdaşlıqla bağlı olduğunu deyib:
“Ermənistana yük daşımalarına məhdudiyyətlərin aradan qaldırılması və neft məhsullarının ixracı çıxışın ən praqmatik və eyni zamanda ən güclü mesajlarından biri kimi qiymətləndirilə bilər. Bu, sülhün artıq real iqtisadi inteqrasiyaya keçdiyini nümayiş etdirir. Azərbaycan burada təşəbbüskar tərəf qismində çıxış edir ki, bu da regional liderlik iddiasını gücləndirir.
Dinlərarası dialoq və Roma Papası ilə Əl-Əzhər imamına təşəkkür edilməsi isə Azərbaycanın sülh modelini təkcə regional deyil, universal dəyər kimi təqdim etməsinə xidmət edir. Bu, ölkəmizin müsəlman dünyası ilə Qərb arasında körpü rolunda çıxış etdiyini göstərmək baxımından olduqca vacibdir”.
Y.Bağırzadə yekunda bu çıxışın Azərbaycanın təkcə müharibədən qalib çıxmış dövlət kimi deyil, eyni zamanda sülhü idarə edən və ixrac edən aktor kimi yeni mərhələyə keçdiyini göstərdiyini diqqətə çatdırıb. O əlavə edib ki, Prezident İlham Əliyev bu nitqlə sülhün artıq dönməz proses olduğunu beynəlxalq səviyyədə həm siyasi, həm də simvolik baxımdan möhürləmiş oldu.
Qeyd edək ki, fevralın 4-də Birləşmiş Ərəb Əmirliklərinin paytaxtı Əbu-Dabi şəhərində “Zayed İnsan Qardaşlığı Mükafatı”nın təqdimolunma mərasimi keçirilib. Azərbaycan Prezidenti İlham Əliyevlə Ermənistanın Baş naziri Nikol Paşinyan təltif ediliblər. Mükafatı Birləşmiş Ərəb Əmirliklərinin (BƏƏ) Prezidenti Şeyx Məhəmməd bin Zayed Al Nəhyan təqdim edib.
Qiymət Mahir
