Aİ-dən Macarıstana qarşı yeni plan: Prinsiplərə zidd davranış...

“Avropa İttifaqının (Aİ) Macarıstanı səsvermə hüququndan məhrum etmə istəyi onu göstərir ki, həqiqətən də Qərb və Avropa üçün bu gün təbliğ etdikləri dəyərlərin heç bir əhəmiyyəti yoxdur”.

Politoloq Elşad Mirbəşiroğlu bunu TodayPress TV-yə açıqlamasında deyib.

O, Qərb institutlarının hər zaman başqa ölkələrə, xalqlara liberalizm dərsi keçməyə can atdıqlarını bildirib:

“Əslində özlərində nə liberallıq, nə də özlərinin dəstəklədiyi dəyərlər mövcud olmur. Bunu həmişə görmüşük. Vaxtilə Böyük Britaniyanın Baş naziri Uinston Çörçil demişdi ki, demokratiya bizim uzaq vuran silahımızdır, o silahla hədəflərimizi rahatlıqla vururuq. Çörçil açıq etiraf etmişdi ki, əslində Qərb üçün demokratiya, liberalizm, söz azadlığı kimi dəyərlər sadəcə silahdır. Onu hansı dövlətlərə, xalqlara təsir göstərmək istəyirlərsə, onlara münasibətdə tətbiq edirlər. Avropa institutları, strukturları daxilində də yanaşma eynidi, yəni bizimlə razı deyilsənsə, deməli bizə qarşısan. Bu baxımdan Aİ çərçivəsində Macarıstana münasibət də demək olar ki, eynidir. Birincisi, Avropa İttifaqı özünün geosiyasi ekspermenti ilə bir dövləti, xalqı məhv etdi”.

Ekspert bugünkü reallıqların, Rusiya-Ukrayna müharibəsinin əslində Rusiya-NATO və Rusiya-Aİ müharibəsi olduğunu göstərdiyini qeyd edib:

“İstifadə olunan resurs Ukrayna dövləti, ərazisi, xalqı oldu. Bu baxımdan, Aİ əslində Ukraynanı üzvlüyə qəbul etməklə vəziyyəti daha da gərginləşdirir. Macarıstanın Baş naziri Viktor Orban da bunu çox yaxşı dərk edir. Əslində Orbanın sərgilədiyi mövqe Aİ-nin özünə də öz simasını qorumağa imkan vermiş olar. Aİ qəbul etsə də, etməsə də, Rusiyaya qarşı real güc ortaya qoya bilməyib”.

Analitikə görə, Ukraynanın Avropaya inteqrasiyası, NATO ilə Ukrayna arasında inteqrasiya sürətləndikcə bu, Ukraynanın vəziyyətini daha da ağırlaşdıracaq. 

“Buna qarşı çıxış edən Macarıstanın da səs hüququ əlindən alınır. Bu onu göstərir ki, həqiqətən də Avropa üçün bu gün təbliğ etdikləri dəyərlərin əslində heç bir əhəmiyyəti yoxdur. Onlar sadəcə olaraq başqa xalqlara təsir və nəzarət imkanlarını formalaşdırmaq üçündür. 500 ilə yaxındır ki, Avropa dünyaya bu cür intriqalarla təsir göstərməkdədir. Bu baxımdan hesab edirəm ki, Macarıstana qarşı sərgilənən münasibət Avropanın dünyaya sırımağa çalışdığı demokratiya, mövqe sərbəstliyi, liberalizm prinsiplərinə dabandabana ziddir. Bununla Avropa İttifaqı bir daha özünün əsl simasını göstərmiş olur”.

Qeyd edək ki, Avropa İttifaqı Şurası mayın 27-də Avropa İttifaqı haqqında Müqavilənin 7-ci maddəsinə uyğun olaraq Macarıstanın Birlikdə səsvermə hüququndan məhrum edilməsi məsələsinə dair dinləmələr keçirəcək. 

Qiymət Mahir