“Qarabağ”ın səsinə Lublin stadionu şahid olacaq!
“Qarabağ”ı Polşada 300-dən çox azarkeş dəstəkləyəcək.
TodayPress TV xəbər verir ki, UEFA Konfrans Liqasının III təsnifat mərhələsində Polşada keçiriləcək “Dinamo Kiyev” – “Qarabağ” oyununda Ağdam təmsilçisi azarkeş dəstəyindən məhrum qalmayacaq.
“Qarabağ” klubunun mətbuat xidmətindən bildirilib ki, komandanı səfər qarşılaşmasında 300-dən çox azarkeş tribunadan dəstəkləyəcək.
Klubun Kommunikasiya departamentinin rəhbəri Anar Hacıyev qonaq azarkeş sektoru üçün 330 biletin alındığını açıqlayıb.
Qeyd edək ki, “Dinamo Kiyev” – “Qarabağ” görüşü bu gün Bakı vaxtı ilə saat 21:00-da Polşanın Lublin şəhərində yerləşən “Lublin Arena” stadionunda keçiriləcək.
Cavab qarşılaşması isə avqustun 13-də saat 20:00-da Tofiq Bəhramov adına Respublika stadionunda baş tutacaq.
Namiq HUN
