Azıx mağarasında təhlil üçün 300-dən çox nümunə götürüldü
"Azıx mağarasında təhlil üçün 300-dən çox nümunə götürülüb".
TodayPress TV xəbər verir ki, bu barədə Arxeologiya və Antropologiya İnstitutunun yekun hesabat iclasında qeyd olunub.
“2025-ci ildə Azad Zeynalovun rəhbərlik etdiyi beynəlxalq Paleolit arxeoloji ekspedisiyası Qarabağın Xocavənd rayonunda yerləşən Azıx mağarasında tədqiqat aparıb. Tədqiqatlar Orhus Universiteti ilə 2023-cü ildə imzalanmış müqavilə əsasında həyata keçirilib. Bu il aparılan tədqiqatların əsas məqsədi mağarada təxminən 15 metrlik çöküntülərin stratigrafiyasını dəqiqləşdirmək, bütün təbəqələrdən müxtəlif üsullarla nümunələr götürmək və çöküntülərin təhlili üçün biomarkerlər götürmək olub”, - iclasda qeyd edilib.
Bildirilib ki, Tağlar mağarasında da tədqiqat aparılıb: “Azad Zeynalovun rəhbərlik etdiyi beynəlxalq ekspedisiya Tağlar mağarasında Tokio Universiteti ilə 2023-cü ildə imzalanmış müqavilə əsasında tədqiqat aparılıb. Bu ilki tədqiqatın əsas nəticəsi 1968-ci ildən sonra ilk dəfə paleoantropoloji qalığın tapılması hesab oluna bilər. Ehtimal olunur ki, bu, yaşı təxminən 80 min il olan neandertal insana aid qalıqdır və hazırda tapıntı Yaponiyada təhlil olunur. Həmçinin, ilk dəfə olaraq stratigrafiya baxımından II və III təbəqələri ayıran sərhəd dəqiqliklə müəyyən edilib, mağaranın ağız hissəsində qazılmamış, orta paleolit dövrünə aid daha qədim təbəqələr aşkar edilib, radiokarbon və OSL analizləri üçün 20-dən artıq nümunə götürülüb”.
Hesabat iclasında qeyd olunub ki, 2025-ci ilin avqust ayında Azıx mağarasında Azərbaycan- Almaniya beynəlxalq akademik araşdırma heyəti də tədqiqat aparıb: “Cari ildə Azıx 2 girişi ilə yanaşı əsas giriş olan Azıx 1-də II və V təbəqələrdə qazıntılar aparılıb, həm Azıx 2, həm də Azıx 1-dən arxeometrik və mikroskopik analizlər üçün nümunələr götürülüb. Stratiqrafik-xronoloji tədqiqatlar üçün sediment və çöküntü qatlarından OSL analizləri, paleo-ekosistem araşdırmaları üçün isə geomorfoloji, mikromorfoloji analizlər məqsədilə nümunələr götürülüb, Almaniya, Norveç və Danimarkaya göndərilib”.
