Tovuzda sürüşmə zonası: 10-a yaxın ev uçmaq təhlükəsi ilə üz-üzədir
Tovuz rayonunda bir neçə evdə çatlar əmələ gəlib. Sakinlərin sözlərinə görə, bu vəziyyət torpaq sürüşməsi ilə əlaqədardır.
TodayPress TV "Xəzər TV"yə istinadən xəbər verir ki, rayonda torpaqda yaranan çuxurlar və yaşayış evlərində müşahidə olunan çatlar sakinlər arasında ciddi narahatlıq yaradıb.
Sakinlər bildirirlər ki, hazırda 10-a yaxın evdə bu cür çatlar var və problem getdikcə daha geniş əraziyə yayılır. Evlərin tavanı, döşəməsi və divarlarında yaranan çatlar təhlükədən xəbər verir.
Tovuz Rayon İcra Hakimiyyəti məsələ ilə bağlı məlumatlı olduqlarını bildirib. Qurumdan verilən açıqlamaya görə, faktla bağlı sənədləşmə aparılır və problemin aradan qaldırılması istiqamətində aidiyyəti qurumlara müraciətlər ediləcək.
