Qiymətlər artdı, saxtakarlıq da çoxaldı: Kənd yumurtasını necə seçək?
Xəbər verdiyimiz kimi, son günlər yumurtanın qiymətində artım müşahidə olunur. Qiymət dəyişikliyi həm broyler, həm də kənd yumurtasına şamil edilir.
Bəs bu iki növ yumurtanı bir-birindən necə ayırd etmək olar?
Mövzu ilə bağlı TodayPress TV-yə danışan qida eksperti İlkin Şirinov bildirib ki, xarici görünüşdə hər ikisi eyni təsir bağışlasa da, aralarında fərq var:
"Bəzi mütəxəssislər heç bir fərqin olmadığını deyirlər. Amma əgər belədirsə, kənd yumurtasının broyler yumurtasından daha baha satılması sual doğurur. Digər tərəfdən, broyler yumurtasının daha təhlükəsiz olduğu iddia edilir. Halbuki broyler toyuqları süni kökəldici yemlər və kimyəvi maddələrlə bəsləndiyindən, onların yumurtalarının tərkibinə də bu kimyəvi elementlərin keçməsi qaçılmazdır".
Ekspert əlavə edib ki, kənd yumurtasının qabığı broyler yumurtasına nisbətən daha qalın olur və bu, əsas fərqlərdən biridir:
"Yumurtalar ağ və ya sarı rəngdə olur. Bəzi satıcılar mağaza yumurtasını rəngləyərək kənd yumurtası kimi təqdim etməyə çalışırlar. Kənd yumurtalarının üzərində istehsal prosesindən qaynaqlanan təbii ləkələr olur. Lakin fırıldaqçılar bunu süni şəkildə hazırlayırlar. İnsanlar kənd yumurtasının təbiiliyinə güvənərək daha yüksək qiymət ödəyirlər".
İlkin Şirinov qeyd edib ki, əgər istehlakçılar aldadılırsa, aidiyyəti qurumlar buna nəzarət etməli, xüsusilə bazarlarda və insanların sıx toplandığı yerlərdə monitorinqlər aparılmalıdır.
Türkan İsgəndərli
