Ekspert: "Azərbaycan dili milli kimliyimizin qorunmasının əsas dayağıdır"

Prezident İlham Əliyev AMEA-nın 80 illik yubileyində çıxışında Azərbaycan dilinin qorunması məsələsinə toxunub. O, dilimizə yad təsirlərin artmasından narahatlığını ifadə edib. Dövlət başçısı qeyd edib ki, bu məsələ təkcə mədəniyyətlə bağlı deyil, həm də milli kimliyin zəifləməsi təhlükəsini yaradır.

Filologiya elmləri doktoru Elçin İbrahimov Prezident İlham Əliyevin Azərbaycan dili ilə bağlı son çıxışını TodayPress TV-yə şərh edərək bildirib ki, dövlət başçısının bu mövzuda fikirləri bir daha dilimizin milli varlığımız və dövlətçiliyimiz üçün strateji əhəmiyyət daşıdığını göstərir.

"Prezident İlham Əliyevin vurğuladığı kimi, dilin yad təsirlərdən qorunması, saflığının və zənginliyinin saxlanılması təkcə mədəni məsələ deyil, milli kimliyimizin qorunması anlamına gəlir. Azərbaycan dövlətinin dil siyasəti bu istiqamətdə ardıcıl və məqsədyönlü şəkildə həyata keçirilir.

2012-2013-cü illərdə qəbul olunmuş "Azərbaycan dilinin qloballaşma şəraitində zamanın tələblərinə uyğun istifadəsinə dair Dövlət Proqramı", 17 iyul 2018-ci il tarixli "Azərbaycan dilinin elektron məkanda daha geniş istifadəsinin təmin edilməsi ilə bağlı tədbirlər haqqında" Sərəncam, eləcə də 1 noyabr 2018-ci ildə imzalanmış "Azərbaycan dilinin saflığının qorunması və dövlət dilindən istifadənin təkmilləşdirilməsi haqqında" Fərman bu siyasətin məntiqi davamıdır".

Alim əlavə edib ki, Prezident İlham Əliyev həm son çıxışında, həm də imzaladığı sənədlərlə Azərbaycan dilinə xüsusi diqqət və həssaslıqla yanaşdığını bir daha nümayiş etdirib:

"Azərbaycan dilinin mükəmməlləşdirilməsi və qorunması istiqamətində həm dövlət qurumlarının, həm də cəmiyyətin birgə fəaliyyəti mühüm əhəmiyyət daşıyır. Bu qərar və sərəncamlar göstərir ki, dövlətin dil siyasəti elmi əsaslara söykənən, ardıcıl və məqsədyönlü bir siyasətdir".

Elçin İbrahimov vurğulayıb ki, bu sənədlərin icrası nəticəsində dövlət dilinin mövqeyi daha da möhkəmlənib, elmi araşdırmaların keyfiyyəti yüksəlib və Azərbaycan dilinin inkişafı üçün əlverişli şərait yaranıb:

"Dilimizə sahib çıxmaq, onu qorumaq və yaşatmaq hər birimizin vətəndaşlıq borcudur. Ana dilinin saflığına diqqət etmək, onu yad təsirlərdən uzaq saxlamaq milli kimliyimizi qorumağın ən etibarlı yoludur", - deyə o bildirib.

Türkan İsgəndərli