Azərbaycanda bu ilin 9 ayında 36 mindən çox nikah bağlanıb
Bu ilin doqquz ayı ərzində Ədliyyə Nazirliyinin rayon (şəhər) qeydiyyat şöbələri tərəfindən ölkə ərazisində 36 min 332 nikaha daxilolma və 15 min 480 boşanma halı qeydə alınıb.
TodayPress TV Dövlət Statistika Komitəsinin məlumatına istinadla bildirir ki, əhalinin hər 1000 nəfərinə nikahların sayı 2024-cü ilin müvafiq dövrü ilə müqayisədə 4,8-dən 4,7-yə, boşanmaların sayı isə 2,1-dən 2-yə enib.
Nikaha daxilolma səviyyəsi Şərqi Zəngəzur (5,8), Qarabağ (5,7), Dağlıq Şirvan və Lənkəran-Astara (5,2), Bakı, Quba-Xaçmaz və Mərkəzi Aran (4,8) iqtisadi rayonlarında ölkə göstəricisindən (4,7) yüksək olub.
2025-ci ilin yanvar-sentyabr ayları ərzində Daxili İşlər Nazirliyi və Dövlət Miqrasiya Xidmətinin müvafiq qurumları daimi yaşamaq üçün Azərbaycana gələn 2 min 521 nəfəri, ölkədən gedən isə 1564 nəfəri qeydə alıb. Ölkə üzrə miqrasiya saldosu müsbət 957 nəfər təşkil edib.
