Süni intellekt və kibertəhlükəsizlik texnoloji dünya trendləri kimi - Bəhruz Əliyevin ŞƏRHİ

Prezident İlham Əliyev Azərbaycan Milli Elmlər Akademiyasının 80 illiyində çıxışında bildirib ki, kibertəhlükəsizlik ölkənin fiziki təhlükəsizliyinin tərkib hissəsidir və Azərbaycana qarşı kiberhücumlar təşkil edənlər cəzasız qalmamalıdır. 

Dövlət başçısı həmçinin süni intellekti gələcək inkişafın əsas istiqamətlərindən biri kimi dəyərləndirərək, alimlərin bu prosesdə fəal iştirakının vacibliyini vurğulayıb. 

Bu kontekstdə, Azərbaycanda hər iki sahənin inkişafı üçün atılması vacib addımlar və yerli mütəxəssislərin rolu ilə bağlı mühüm suallar ortaya çıxır.

Mövzu ilə bağlı TodayPress TV-yə danışan İnformasiya Texnologiyaları üzrə mühəndis-tədqiqatçı, Azərbaycan Kibertəhlükəsizlik Təşkilatları Assosiasiyasının (AKTA) eksperti Bəhruz Əliyev bildirib ki, AMEA-nın tədbirində verilən mesajlar kibertəhlükəsizlik və süni intellektin mərkəzi prioritetə çevrildiyini göstərir: 

"Azərbaycan Milli Elmlər Akademiyasının 80 illiyində Prezidentin kibertəhlükəsizlik və süni intellektlə bağlı səsləndirdiyi fikirlər bizim kimi mühəndislər üçün bir mayakdır. Bu və bənzər sahələrdə fəaliyyət göstərən və bu istiqamətlərin tədrisi ilə məşğul olan biri kimi demək olar ki, üzərimizə ciddi mənəvi məsuliyyət düşür. Ölkəmiz hər zaman aparıcı xətt üzrə irəliləyir və daimi inkişafı hədəfləyir. Heç bir texnoloji inkişafdan geri qala bilmərik. Dünyanın bir parçası kimi mövcud trendləri təqib etmək ciddi əhəmiyyət daşıyır".

Ekspert qeyd edib ki, geridə qalmamaq üçün yerli mütəxəssislər yetişdirilməlidir:

"Tarixdə bəzi trendləri düzgün qiymətləndirməyən və əhəmiyyətsiz sayan bir çox ölkə və şirkətin uğursuzluq hekayələri mövcuddur. Biz isə tarixdəki bu nümunələrdən düzgün dərslər çıxarıb məharətlə inkişaf etməliyik və edirik. Ona görə də yerli mütəxəssislərin hazırlanması və bu prosesə cəlb olunması, fikrimcə, çox əhəmiyyətlidir".

B.Əliyev əlavə edib ki, yerli mütəxəssislər prosesdə həlledici rol oynayır:

"Yerli mütəxəssislər bu prosesin mərkəzində olmalıdır. Onlar milli tələbləri, yerli konteksti daha dərindən bilirlər. Dil, yerli infrastruktur, biznes mühiti, dövlət strukturları və təhlükə profili baxımından daha çox məlumata sahibdirlər. Xarici ekspertlərlə əməkdaşlıq olsa da, biliklərin yerli kontekstə uyğunlaşdırılması və davamlılığı üçün yerli insan resursu vacibdir. Mütəxəssislər prototiplər hazırlayaraq, onları yerli reallıqlara adaptasiya edərək həm dövlət, həm də biznes sektorunda tətbiq edə bilərlər. Eləcə də etik, hüquqi və sosial aspektlər üzrə yerli ekspertlər xüsusi rol oynaya bilərlər".

Jalə Rövşən