"Apple" 2026-cı il üçün böyük yeniliklərə hazırlaşır
Qatlanan iPhone, daha ucuz MacBook, jestləri tanıyan AirPods və dizaynı yenilənən Apple Watch — 2026-cı ildə Apple ekosistemində ciddi dəyişikliklər gözlənilir.
TodayPress TV "Gazeta.ru"ya istinadən xəbər verir ki, Apple-ın 2026-cı ildə təqdim edəcəyi məhsullarla bağlı şayiələr texnologiya dünyasında böyük maraq doğurub.
Rəsmi olmayanan mənbənin məlumatına görə, Apple ilk dəfə payız təqdimatında baza iPhone modelini buraxmaya bilər. Tədbirdə yalnız iPhone 18 Pro və qatlanan iPhone Fold-un təqdim ediləcəyi iddia olunur.
Standart iPhone 18 modelinin isə daha büdcəli iPhone 18e ilə birlikdə 2027-ci ilin yazında satışa çıxarılması ehtimal edilir.
2026-cı il “iPhone mövsümü” iPhone 17e modeli ilə başlayacaq. V159 kod adlı bu cihaz iPhone 16e-nin dizaynını saxlayacaq, lakin əsas çatışmazlıqlar aradan qaldırılacaq. Xüsusilə, MagSafe simsiz şarj dəstəyinin geri qayıdacağı və şarj gücünün əhəmiyyətli dərəcədə artırılacağı bildirilir. Modelin A19 çipi və Apple-ın ikinci nəsil C1X modemi ilə təchiz olunacağı gözlənilir.
Payız təqdimatının əsas yeniliklərindən biri iPhone 18 Pro və Pro Max olacaq. Bu modellərdə Face ID texnologiyasının tamamilə ekran altına yerləşdiriləcəyi, beləliklə Dynamic Island dövrünün başa çatacağı iddia edilir. Yeni flaqmanlar mexaniki diafraqmalı 48 MP əsas kamera və 2 nanometrlik A20 Pro çipi ilə təchiz olunacaq.
Ən çox diqqət çəkən məhsul isə qatlanan iPhone Fold olacaq. Açıq vəziyyətdə planşeti xatırladan bu cihazın multimedia və peşəkar istifadə üçün nəzərdə tutulduğu bildirilir.
iPad xəttində də yeniliklər gözlənilir. Baza iPad A18 çipi alaraq ilk dəfə Apple Intelligence funksiyalarını dəstəkləyə bilər. iPad Air modellərinin isə daha güclü çiplər və yüksək tezlikli OLED ekranlarla yenilənəcəyi iddia olunur. Payızda təqdim ediləcəyi gözlənilən iPad Pro modelləri isə M5 çipi ilə işləyəcək.
Apple Watch Series 12-nin dizayn baxımından daha nazik və yüngül olacağı, yeni biometrik sensorlar vasitəsilə sağlamlıq göstəricilərinin ölçülməsini genişləndirəcəyi bildirilir. Watch Ultra modelində də oxşar sensorların yer alacağı gözlənilir.
MacBook xəttində isə ən maraqlı yenilik smartfon çipi ilə işləyəcək büdcəli model olacaq. A18 Pro çipi ilə təchiz ediləcək bu MacBook əsas gündəlik istifadə üçün nəzərdə tutulacaq və Apple-ın ən əlçatan noutbuklarından biri ola bilər.
Qeyd edək ki, bütün bu məlumatlar rəsmi təsdiqini tapmayıb və Apple-ın 2026-cı il strategiyası yalnız təqdimatlar zamanı dəqiqləşəcək.
Jalə Rövşən
