“Barselona” rüşvət ittihamı ilə üz-üzə
Madrid “Real”ının vəkilləri, Negreyrə işi üzrə şəxsi iddiaçı qismində iştirak edərək, məhkəmə dinləməsində “Barselona” prezidenti Joan Laportanı dindiriblər.
TodayPress TV xəbər verir ki, bu barədə AS nəşri məlumat yayıb.
Bildirilir ki, “kral klubu”nun vəkilləri Laportadan keçmiş texniki komitə vitse-prezidenti (CTA) Xose Mariya Negreyrəyə ödənişlərin niyə 800% artırıldığı, onun oğlunun “mavi-qırmızılar”ın hakimlər barədə hazırladığı, amma açıqlanmayan hesabatlarda iştirak edib-etmədiyi barədə suallar veriblər.
Bundan əlavə, “Real”ın vəkilləri Laportaya “Barselona”nın niyə ödənişləri vergi orqanlarından gizlətdiyini və onların ilkin mənşəyini soruşublar.
Xatırladaq ki, 2023-cü ildə “mavi-qırmızılar”a, İspaniya Krallıq Futbol Federasiyasında (RFEF) çalışan Negreyrəyə ödənişlər zamanı rüşvət vermək ittihamı irəli sürülüb. “Barselona”nın 2001–2018-ci illərdə təxminən 8,4 milyon avro məbləğində ödəniş etdiyi iddia olunur.
Kataloniya təmsilçisinin versiyasına görə, Negreyrə texniki hesabatların hazırlanması üçün xarici məsləhətçi kimi işə götürülüb. CTA-nın keçmiş vitse-prezidenti isə hakimlərə təsir etmək məqsədilə rüşvət aldığı ittihamını inkar edir.
Namiq HUN
