Yay mövsümündə necə qidalanmalıyıq? – Mütəxəssis rəyi

Havalar isindikcə iştahsızlıq və ya zəhərlənmə kimi hallar artır. 

Bəs belə problemlərlə üzləşməmək üçün hansı qidaları istehlak etmək lazımdır?

“Refresh Group” MMC-nin Baş İcraçı Direktoru, qida təhlükəsizliyi üzrə ekspert Seymur Qafarov TodayPress TV-yə açıqlamasında bildirib ki, yay fəslində düzgün qidalanma sağlamlığın əsas şərtidir.

Ekspert yay aylarında mövsümi meyvə və tərəvəzlərin qidalanmada üstünlük təşkil etməsini tövsiyə edib.

"Qarpız, yemiş, xiyar, pomidor və böyürtkən kimi su tərkibli qidalar bədəni nəmləndirir və enerjili saxlayır. Yaşıl yarpaqlı tərəvəzlər isə immun sistemini gücləndirir və orqanizmi vacib vitaminlərlə zənginləşdirir. Su balansının qorunması yay fəslində xüsusi əhəmiyyət daşıyır. İnsan gündəlik olaraq 2,5–3 litr su içməlidir."

Mütəxəssis əlavə edib ki, ayran, limonlu su, şəkərsiz kompotlar və bitki çayları da orqanizmi susuzluqdan qoruyur. Əvəzində isə qazlı və çox şəkərli içkilərdən uzaq durmaq tövsiyə olunur.

Onun fikrincə, yay aylarında yüngül və asan həzm olunan qidalar qida rasionunda üstünlük təşkil etməlidir. 

“Toyuq, balıq və paxlalılar kimi protein mənbələri əzələ toxumasını qoruyur və enerji verir. Bununla yanaşı, qızardılmış və yağlı yeməklərdən çəkinmək, əvəzində buxarda və ya qril üsulu ilə bişirilmiş yeməklərə üstünlük vermək məsləhətlidir”.

Qida təhlükəsizliyi və gigiyena məsələsinə də toxunan Seymur Qafarov yayda bu sahədə daha diqqətli olmağın vacibliyini bildirib.

Onun sözlərinə görə, qarpız və yemiş kimi torpaqla təmasda olan meyvələr istifadə olunmazdan əvvəl mütləq yuyulmalıdır.

“Hazırlanmış yeməklər isə uzun müddət saxlanılmamalıdır. Hətta soyuducuda belə. Açıq havada satılan və tez xarab olan qidalardan uzaq durmaq, isti yeməklər isə 60°C və daha yüksək temperaturda saxlanması məqsədəuyğundur. Sağlam qəlyanaltılar da diqqətdə saxlanmalıdır. Bu baxımdan badam, fındıq, təbii yoqurt kimi yüngül və sağlam qəlyanaltılar gün ərzində orqanizmin enerji ehtiyacını qarşılayır”.

Ekspert bildirib ki, günün ən isti saatları olan 12:00–16:00 aralığında açıq günəş altında qalmaqdan çəkinmək lazımdır. 

Həmin saatlarda bol su içmək və yüngül qidalanmaq günvurmadan qorunmaq üçün vacibdir. O, həmçinin yay aylarında dəniz kənarına aparılan qidalar barədə də vacib tövsiyələr verib.

Qeyd edib ki, isti hava şəraitində qida təhlükəsizliyinə xüsusi həssaslıqla yanaşmaq lazımdır.

"İzotermik çantalar və buz paketlərindən istifadə etmək məsləhətlidir. Bu vasitələr qidaların temperatur balansını qorumağa kömək edir. Qidalar kiçik porsiyalarda qablaşdırılmalı, soyuducu isə mütləq kölgədə saxlanmalıdır. Mayonezli salatlar, kremli şirniyyatlar və dondurulmuş məhsullar da isti şəraitdə mikrobioloji təhlükə yarada bilər".

Sonda Seymur Qafarov vurğulayıb ki, yay mövsümündə düzgün və təhlükəsiz qidalanma yalnız sağlamlığı qorumaq üçün deyil, həm də gündəlik həyat keyfiyyətini yüksəltmək üçün vacibdir.

Türkan İsgəndərli