Video oyunları stressi azaldır?
Alimlərin fikrincə, yatmazdan əvvəl sürətli video oyunlar oynamaq yuxu keyfiyyətinə zərər verməyə bilər və hətta zehni sağlamlığa fayda verə bilər.
TodayPress TV xəbər verir ki, bu barədə "Gazeta.ru"da tədqitat məqaləsi dərc olunub.
Qeyd edilib ki, bu tədqiqat "Sleep Medicine" jurnalında dərc olunub.
Tədqiqatda nadir hallarda video oyun oynayan 18 gənc iştirak edib. Bir neçə həftə ərzində tədqiqatçılar üç vəziyyəti müqayisə ediblər: adi gündəlik işləri, yatmazdan əvvəl televiziya serialına baxmaq və axşam bir saat atıcı oyun oynamaq. İştirakçılar yuxu izləmə cihazları taxıb, idrak testləri verib və rifah anketlərini doldurublar.
Məlum olub ki, axşam oyun oynamaq obyektiv yuxu parametrlərinə xələl gətirməyib. Yuxuya getmə vaxtı, dərin yuxunun müddəti və oyanışların sayı dəyişməz qalıb. Lakin seriala baxdıqdan sonra yuxu bir qədər pisləşib.
Alimlər qeyd edirlər ki, oyun zamanı intensiv öyrənmə — idarəetmə elementlərinin mənimsənilməsi, naviqasiya və reaksiya müddətləri — yuxu zamanı informasiya emalı mexanizmlərini aktivləşdirə bilər. Bu isə sabit yuxu quruluşunun qorunmasına kömək edir.
Bundan əlavə, oyun sessiyalarından sonra iştirakçılar vizual-məkan işçi yaddaş testlərində daha yaxşı nəticə göstəriblər. Bu tip yaddaş vizual məlumatların saxlanması və emalından məsuldur və məkan oriyentasiyasında fəal şəkildə istifadə olunur.
Psixoloji rifahda da müsbət dəyişikliklər müşahidə edilib. İştirakçılar bir neçə axşam video oyun oynadıqdan sonra stress səviyyələrinin azaldığını bildiriblər. Lakin narahatlıq və ya depressiyada əhəmiyyətli dəyişiklik qeydə alınmayıb.
Müəlliflər vurğulayırlar ki, oyun formatı əhəmiyyətli rol oynayır: təcrübədə iştirakçılar bir saatdan çox oynamayıblar və yatmazdan 30 dəqiqə əvvəl oyunu bitiriblər. Digər tədqiqatlarda isə daha uzun oyun seanslarının yuxu keyfiyyətinə mənfi təsir göstərdiyi məlum olub.
Həmçinin, nəticələr yalnız oyun təcrübəsi olmayan insanlara aiddir — təsir adi oyunçular üçün fərqli ola bilər, çünki onların beyinləri artıq bu cür stresə uyğunlaşıb.
Lakin tədqiqat göstərir ki, orta səviyyəli oyun seansları yalnız yuxu üçün təhlükəsiz deyil, həm də idrak funksiyasını yaxşılaşdırmaq və gündəlik stressi azaltmaq üçün faydalı ola bilər.
Jalə Rövşən
