Qadınların beyni üçün faydalı olan ət növü hansıdır?
Müntəzəm mal əti istehlakı gənc qadınlarda diqqəti, yaddaşı və vizual informasiya emalı sürətini yaxşılaşdıra bilər.
TodayPress TV xəbər verir ki, bu barədə "Gazeta.ru"da məqalə dərc olunub.
Tədqiqatçılar bildirirlər ki, dəmir çatışmazlığı reproduktiv yaşda olan qadınlar arasında geniş yayılmış problemdir. Dəmir oksigenin daşınmasında, neyrotransmitterlərin sintezində və sinir sisteminin funksiyalarının qorunmasında iştirak edir. Buna görə də onun çatışmazlığı idrak funksiyalarına mənfi təsir göstərə bilər.
Mütəxəssislərin sözlərinə görə, mal əti dəmirin ən effektiv qida mənbələrindən biri hesab olunur, çünki tərkibindəki dəmir orqanizm tərəfindən asanlıqla mənimsənilir. Mal ətinin tərkibində yaddaş və diqqət cəmləşməsi ilə əlaqəli olan B12 vitamini, sink, xolin və kreatin də mövcuddur.
30 günlük pilot tədqiqatda sağlam gənc qadınların bir qrupu gündəlik 85 qram mal əti kotleti qəbul edib, nəzarət qrupu isə makronutrient tərkibi oxşar olan soya əsaslı tərəvəz kotletləri yeyib.
İştirakçıların idrak funksiyası üçölçülü məkanda eyni anda bir neçə hərəkət edən obyekti izləmək qabiliyyətini ölçən Neurotracker sistemi vasitəsilə qiymətləndirilib. Nəticələr göstərib ki, mal əti istehlak edən iştirakçılar nəzarət qrupu ilə müqayisədə vizual-məkan qavrayışı və vizual emal sürətində əhəmiyyətli dərəcədə irəliləyiş nümayiş etdiriblər.
Qanında dəmir səviyyəsi əhəmiyyətli dəyişiklik göstərməyən iştirakçılarda belə idrak göstəricilərinin yaxşılaşması müşahidə olunub. Bu isə təsirin təkcə dəmirin deyil, mal ətindəki digər qida maddələrinin də rol oynaya biləcəyini göstərir.
Alimlər əlavə edirlər ki, ən nəzərəçarpan irəliləyişlər əvvəlcədən dəmir səviyyəsi aşağı olan qadınlarda qeydə alınıb. Bununla belə, nəticələri təsdiqləmək üçün daha uzunmüddətli və genişmiqyaslı tədqiqatlara ehtiyac var.
Jalə Rövşən
