Jurnalistə qarşı dələduzluqla bağlı məhkəmədə qərar elan edildi

Bakıda müştərinin etibarından sui-istifadə edərək ona qarşı dələduzluq etməkdə təqsirləndirilən Fərrux Əsgərov və Rabil Tağıyevlə bağlı iddia üzrə məhkəmənin yekun prosesi keçirilib.

Todaypress TV  xəbər verir ki, Xətai Rayon Məhkəməsində hakim Əminə Abbasovanın sədrliyi ilə keçirilən prosesdə təyin olunmuş ekspertizaya əsasən dəymiş ziyan elan olunub.

Məhkəmə ekspertiza xidmətləri MMC-nin eksperti Xəyyam İsgəndərov vurulam ziyanın 11 min manat olduğunu hesablayıb.

Daha sonra, məhkəmədə qərar elan edilib. Fərrux Əsgərovun zərərçəkənə 9 min manat ödəməsinə qərar verilib. Rabil Tağıyevə isə cəza təyin edilməyib.

Jurnalist Maqda Kovalyova təyin edilən cəzadan narazı qaldığını bildirib: "Bizim fikrimizcə ekspertiza düzgün keçirilməyib. Biz dəymiş ziyanı ustalarla birgə 18 min manat hesablamışdıq. Lakin 11 min manat elan edildi. Nəticə olaraq isə qərarda 9 min gös manat göstərilib və bu bizim evdəki işin bitməsinə köməklik etməyəcək. Hakim evimizə aldığımız kafel pulunun protokola daxil edilmədiyini söylədi. Heç Fərrux Əsgərov qərarı belə gözləmədi, çıxıb getdi. Bizə dedi ki, "nə yazacaqsa, yazacaq". Bunu düzgün hesab etmirəm".

O, qərardan apellyasiya şikayəti verəcəyini əlavə edib.

Qeyd edək ki, cavabdeh Fərrux Əsgərov və Rabil Tağıyev şifahi razılaşma əsasında evi təmir edib təhvil veriləcəyi ilə bağlı öhdəlik götürərək iddiaçılar Vladimir Kovalyov və Maqda Kovalyovadan ümumilikdə 34 502 manat pul alıb. Lakin o, evin təhvil vaxtını dəfələrlə müxtəlif bəhanələr gətirərək təxirə salıb. Evi tam təhvil vermədiyi üçün iddiaçı tərəf cavabdehdən evin təmiri üçün xərclənməmiş 18 min manat vəsaiti tələb edib və bununla bağlı polisə müraciət olunub. Cavabdeh tərəf onlardan vaxt istəyərək 10 gün ərzində evi təhvil verəcəklərini bildirsələr də, heç bir addım atılmayıb. Daha sonra iddiaçı tərəf məhkəməyə müraciət edib.

Zərərçəkən şəxs bildirib ki, Fərrux Əskərov evin pəncərəsini yandırıb, pəncərə kənarlarını qırıb. Bunun səbəbini soruşduqda isə ustaların etdiyini bildirib. Bununla yanaşı, eyvanda olan 3 pəncərə də düzgün yerləşdirilməyib. Maqda Kovalyova, taksi sürücüsü kimi fəaliyyət göstərın Fərrux Əskərovun vasitəçi olduğunu bildirib.

Qeyd edib ki, Fərrux Əskərov birinci xərclər smetasında ümumi xərci 23.470 manat göstərib. Rabil Tağıyevin tərtib etdiyi smetanın məbləği isə 17.470 manat təşkil edib. Təmirə başlayan zaman Fərrux Əskərov az vəsait xərcləmək üçün ucuz inşaat materiallarından istifadə edəcəyini və öz haqqını ustaların pulundan götürəcəyini deyib: “Aydındır ki, o, smetada fərqli qiymət göstərərək bizi aldadıb”.