Emin Əmrullayev Türkiyənin basketbol klubunun prezidenti ilə görüşdü

Azərbaycan Basketbol Federasiyasının (ABF) prezidenti Emin Əmrullayev və ABF rəsmiləri ilə Türkiyənin tanınmış qadın basketbol klublarından biri olan "Nəsibə Aydın"ın prezidenti Mirkan Aydın, bu klubun nümayəndələri arasında rəsmi görüş keçirilib.

TodayPress TV ABF-nin mətbuat xidmətinə istinadən xəbər verir ki, görüşün əsas mövzusu iki ölkə arasında qadın basketbolunun inkişafı, ortaq layihələr və qarşılıqlı təcrübə mübadiləsi məsələləri olub.

Tərəflər gələcəkdə müxtəlif yaş qrupları üzrə qadın basketbolçular arasında birgə turnirlər və təlim proqramlarının həyata keçirilməsi perspektivlərini də dəyərləndiriblər.

Emin Əmrullayev görüş zamanı Türkiyə basketbolunun bölgədəki təcrübəsindən faydalanmağın müsbət tərəflərindən danışıb və "Nəsibə Aydın" klubunun qadın basketbolundakı uğurlarını yüksək qiymətləndirib.

Mirkan Aydın da Azərbaycan basketbolunda son illərdə müşahidə olunan inkişafı təqdir edərək, gələcək əməkdaşlıqlarda uğurlu nəticələrin qeydə alınacağına inandığını söyləyib.