Rusiya yoxa çıxır, nə edirsiniz?

Rusiyanın tanınmış hərbi xadimi, istefada olan general-polkovnik Leonid İvaşov Ukraynaya qarşı aparılan müharibəni kəskin tənqid edib.

TodayPress TV xəbər verir ki, uzun illər Ümumrusiya Zabitlər Assambleyasına rəhbərlik etmiş İvaşov hazırkı müharibənin Rusiyanın elan etdiyi məqsədlərə çatmadığını bildirib.

General 1999-cu ildə Rusiya qoşunlarının Priştinaya yürüşünü uğurlu xüsusi əməliyyat kimi qiymətləndirərək, həmin əməliyyatın itki olmadan həyata keçirildiyini və ölkəyə beynəlxalq nüfuz qazandırdığını xatırladıb. Onun sözlərinə görə, Ukraynadakı müharibə isə böyük itkilərə baxmayaraq qarşıya qoyulan məqsədlərin heç birini reallaşdıra bilməyib.

İvaşov Rusiya rəhbərliyini sərt tənqid edərək ölkənin həm xarici siyasətdə, həm də daxili idarəçilikdə ciddi problemlərlə üzləşdiyini deyib. O, Rusiyanın Cənubi Qafqazdakı təsir imkanlarının zəiflədiyini, region ölkələrinin isə getdikcə Avropa İttifaqı və NATO ilə daha sıx əməkdaşlığa üstünlük verdiyini vurğulayıb.

General ölkədə fərqli fikirlərə qarşı təzyiqləri və "xarici agent" statusunun geniş tətbiqini də tənqid edib. O, Ukrayna pilotsuz uçuş aparatlarının hətta iri beynəlxalq tədbirlər zamanı belə Rusiya ərazisinə zərbələr endirə bilməsini təhlükəsizlik sahəsində ciddi uğursuzluq kimi qiymətləndirib.

İvaşovun sözlərinə görə, Rusiya nə əməliyyat-taktiki, nə də strateji səviyyədə mühüm uğur əldə edə bilib. O, sənaye, elm, təhsil, səhiyyə və iqtisadiyyatda dərin problemlərin mövcud olduğunu, qiymət artımı və həyat səviyyəsinin aşağı düşməsinin cəmiyyətdə narahatlıq yaratdığını bildirib.

General, həmçinin korrupsiya, demoqrafik geriləmə və ərzaq məhsullarının keyfiyyətinin pisləşməsini ölkənin əsas problemləri sırasında göstərib. Onun fikrincə, Rusiya beynəlxalq arenada getdikcə daha çox təcrid olunur və Çinin Moskvanın təqdim etdiyi qədər etibarlı müttəfiq olmadığı da görünür.

İvaşov nüvə silahından istifadənin mövcud problemləri həll etməyəcəyini, əksinə, bütün tərəflər üçün fəlakətli nəticələr doğuracağını qeyd edib.

Sonda o xəbərdarlıq edib ki, Ukrayna müharibəsində strateji məğlubiyyət Rusiyanın gələcəyi üçün son dərəcə ağır nəticələrə səbəb ola bilər.

Qiymət Mahir