Rusiya Ukraynadan oğurladığı taxılı heç kimə sata bilmədi - Dünyada biabır oldu
Rusiyanın işğal altındakı Ukrayna ərazilərindən oğurlandığı iddia edilən taxıldan gəlir əldə etmək planı ciddi problemlərlə üzləşib.
TodayPress TV xəbər verir ki, işğal altındakı Berdyansk limanından yüklənən və Ukraynaya məxsus olduğu bildirilən taxılı daşıyan “Panormitis” yük gəmisi həm İsrail, həm də Türkiyə tərəfindən qəbul edilməyib.
Hazırda gəminin yenidən Rusiyaya doğru istiqamət aldığı, ehtimal ki, Novorossiysk və ya Qafqaz limanlarından birində yükünü boşaldacağı bildirilir.
Mənbələr qeyd edir ki, bu uğursuz səfər Moskvanın taxıl ticarəti ilə bağlı artan iqtisadi risklərini üzə çıxarır. İddialara əsasən, təkcə 2025-ci ildə 2 milyondan artıq ton Ukrayna taxılı oğurlanıb. Lakin əvvəllər əsas alıcılar hesab olunan Misir, İsrail və Türkiyə kimi ölkələrin artıq bu cür yükləri qəbul etməkdən imtina etdiyi vurğulanır.
Ekspertlərin fikrincə, hər geri qaytarılan yük Rusiya üçün əlavə nəqliyyat xərcləri, reputasiya itkisi və kölgə taxıl ticarətindən əldə olunan gəlirlərin azalması deməkdir.
Bildirilir ki, Ukrayna qanuni taxıl ixracından milyardlarla dollar itirdiyi halda, Rusiya isə oğurlandığı iddia olunan məhsulu satmaqda getdikcə daha çox çətinlik yaşayır. Mənbələrə görə, “oğurlanmış taxıl” artıq Moskva üçün gəlir mənbəyindən çox, baha başa gələn və satılması çətin yükə çevrilir.
