Rusiya-Ukrayna danışıqlarının ikinci raunduna hazırlıq: İstanbulda nələr gözlənilir?

Rusiya tərəfi Ukrayna ilə birbaşa danışıqların bərpası çərçivəsində hazırladığı və münaqişənin əsas səbəblərinin aradan qaldırılmasını əhatə edən memorandumu təqdim etməyə hazırdır. Sənədin 2 iyun tarixində İstanbulda baş tutacaq ikinci raund görüşündə təqdim olunması nəzərdə tutulur.

TodayPress TV xəbər verir ki, bu barədə Rusiya Xarici İşlər naziri Sergey Lavrov məlumat verib.

Hazırda Ukrayna tərəfi bu görüşdə iştirakla bağlı dəqiq mövqe bildirməyib.

Lavrov Türkiyə xarici işlər naziri Hakan Fidanla telefon danışığından sonra yaydığı açıqlamada bildirib ki, Rusiya danışıqların bərpası barədə razılığa uyğun şəkildə memorandumu sürətlə hazırlayıb və ümid edir ki, sülh prosesində həqiqətən maraqlı olan tərəflər bu təşəbbüsü dəstəkləyəcəklər.

Danışıqların formatı və mövcud vəziyyət

Rusiya Xarici İşlər Nazirliyinin sözçüsü Mariya Zaxarova bildirib ki, ikinci raund üçün Rusiya nümayəndə heyətinin tərkibi dəyişməyəcək.

Ukrayna müdafiə naziri və danışıqlardakı nümayəndə heyətinin rəhbəri Rustem Umerov isə qeyd edib ki, Kiyev Rusiya ilə görüşə qarşı deyil, lakin görüşdən əvvəl Moskvadan memorandumun təqdim olunmasını gözləyir. Kremlin sözçüsü Dmitri Peskov bu tələbə “qeyri-konstruktiv” yanaşma deyərək cavab verib və açıqlayıb ki, əsas məsələ danışıqların davam etdirilməsidir. O əlavə edib ki, hələlik Ukrayna tərəfi təklif olunan görüş tarixini təsdiqləməyib.

Türkiyənin vasitəçilik rolu

Türkiyə XİN rəhbəri Hakan Fidan 29 may tarixində Ukraynaya səfəri zamanı jurnalistlərə açıqlamasında deyib ki, İstanbulda 2 iyun tarixində keçirilməsi planlaşdırılan danışıqlar mühüm əhəmiyyət kəsb edir və hazırda Rusiya Ukraynadan cavab gözləyir. Fidan həmçinin əlavə edib ki, Rusiya və Ukraynanın atəşkəs rejiminin tətbiqi ilə bağlı mövqeləri fərqlidir və bu fərqliliklərin razılaşdırılması vacibdir.

Fidan öz Moskva səfəri zamanı prezident Vladimir Putin, köməkçisi Vladimir Medinski, XİN rəhbəri Sergey Lavrov və Xarici Kəşfiyyat Xidmətinin rəhbəri Sergey Narışkinə Türkiyənin sülhə dair real yanaşmaları ilə bağlı təkliflərini çatdırdığını deyib. Ankara hazırda Moskva, Kiyev, Vaşinqton və Avropa paytaxtları ilə fəal diplomatik təmaslarını davam etdirir.

Rusiya nümayəndə heyətinin rəhbərinə təhdidlər

Mayın 28-də məlum olub ki, Rusiya nümayəndə heyətinin rəhbəri Vladimir Medinski və onun ailəsinə qarşı ukraynalı millətçilər tərəfindən təhdidlər edilib. Onun şəxsi məlumatları “Mirotvorets” adlı saytda dərc olunub. Sayt Ukraynanın düşmən hesab etdiyi şəxslərin reyestrini aparır.

Bu məsələ ilə bağlı Rusiya İstintaq Komitəsinin sədri Aleksandr Bastrıkin 29 mayda Medinskiyə qarşı təhdidlərlə əlaqədar cinayət işi açılması barədə göstəriş verib.

ABŞ və Avropa nümayəndələri də iştirak edəcək?

ABŞ prezidentinin xüsusi nümayəndəsi Kit Kelloq bildirib ki, 2 iyun tarixində İstanbulda ABŞ, Almaniya, Fransa və Böyük Britaniya nümayəndələri də iştirak edəcək. Onlar bölgədə sabitlik və təhlükəsizlik məsələlərinə dair ikitərəfli müzakirələrdə yer alacaqlar.

Lakin Amerikanın “The Atlantic” jurnalı açıqlayıb ki, ABŞ iyunun 2-də İstanbulda Rusiya və Ukrayna arasında keçiriləcək danışıqların ikinci raundunda iştirak etmək üçün nümayəndə heyəti göndərməyi planlaşdırmır. Məlumat hələ ki, rəsmi təsdiqini tapmayıb.

Danışıqların nəticəsi və tərəflərin mövqeləri yaxın günlərdə daha da aydınlaşacaq.

Töhfə Səməd