Ağ Ev Trampın "McDonald’s"da işlədiyi şəkli yaydı
Ağ Ev ABŞ prezidentinin qarşıdan gələn Əmək Günü münasibətilə çəkilmiş fotosunu dərc edib. Şəkildə Donald Tramp “McDonald’s” şəbəkəsində işləyirmiş kimi pəncərədən müştərilərə əl yelləyir.
TodayPress TV xəbər verir ki, post “X” sosial şəbəkəsində “Əmək günü demək olar ki, gəlib çatdı” qeydi və ABŞ bayrağı emojisi ilə paylaşılıb.
Tramp hələ 2024-cü il oktyabrın 20-də seçki kampaniyası çərçivəsində Pensilvaniyada "McDonald’s" filialında qısa müddət işləyib. O, önlüyünü geyinərək kartof qızardıb və avtomobil kafesində sifarişləri müştərilərə təqdim edib.
O zaman Tramp bu addımını Demokratlar Partiyasının namizədi Kamala Harrisə cavab kimi izah etmişdi. Onun sözlərinə görə, Harris seçki kampaniyası zamanı "McDonald’s"da işlədiyini iddia etsə də, bu həqiqətə uyğun gəlmir. Tramp isə zarafatla həmin gün “Kamala Harrisdən 15 dəqiqə çox işlədiyini” bildirmişdi.
Qiymət Mahir
