Ət və süd məhsullarını alarkən EHTİYATLI OLUN! - XƏBƏRDARLIQ
Son günlər dabaq xəstəliyi cəmiyyətdə narahatlıq yaradır. Xüsusilə də heyvan mənşəli xəstəliklərin insanlara keçməsi ilə bağlı qorxu hallarının artdığı müşahidə olunur.
Bəs həqiqətən bu xəstəlik insanlara keçə bilər?
Azad İstehlakçılar Birliyinin sədri Eyyub Hüseynov TodayPress TV-yə açıqlamasında qeyd edib ki, yer üzündə mövcud olan xəstəliklərin təxminən 75 faizi tarix boyu heyvan mənşəli olub, yəni heyvanlardan insanlara keçib. Dabaq da həmin xəstəliklərdən biridir.
Onun sözlərinə görə, dabaq yeni deyil və lazımi gigiyenik qaydalara əməl olunduğu halda, insan sağlamlığı üçün ciddi təhlükə yaratmır:
"Ancaq insanın əlində yara və ya xırda bir cızıq olduqda, xəstə heyvanın dərisinə, ağzına, selikli qişasına və ya ətinə toxunmaq yoluxma riskini artırır. Eyni zamanda, immun sistemi zəif olan şəxslər xəstə heyvana çox yaxın məsafədə olduqda nəfəs məsafəsində virusun keçməsi mümkündür".
Mütəxəssis vətəndaşlara tövsiyə edib ki, ət və süd məhsullarını alarkən ehtiyatlı davransınlar, lakin panikaya qapılmasınlar:
"Sadəcə bu məhsullar mütləq şəkildə yaxşı bişirilməli və ya qaynadılmalıdır. Yüksək temperaturda bişirilən və ya qaynadılan ət və süd məhsullarında dabaq virusu məhv olur. Buna görə də kifayət qədər istilikdə emal olunan məhsullardan istifadə etmək tam təhlükəsizdir".
Eyyub Hüseynov vurğulayıb ki, əsas məsələ düzgün emal və gigiyenik qaydalara əməl etməkdir. Bu halda dabaq xəstəliyinin insanlara keçməsi riski minimuma enir.
Türkan İsgəndərli
