Azərbaycan polisi 107 yaşında: Şərəfli yola baxış!

"107 yaşını qeyd edən Azərbaycan Polisi şərəfli və keşməkeşli yol keçib. Azərbaycan Xalq Cümhuriyyəti dövründə dövlətin formalaşmasında, milli maraqların qorunmasında mühüm rol oynayan polis orqanları müstəqilliyin müdafiəsində ön sıralarda olub".

Bu barədə “İnsan Alverinə Qarşı Mübarizə Təşkilatı”nın sədri Ramiz Alıyev TodayPress TV-yə danışarkən bildirib.

Onun sözlərinə görə, Azərbaycan Xalq Cümhuriyyəti dövründə formalaşan polis orqanları dövlətin qurulmasında və milli maraqların qorunmasında mühüm rol oynayıb. Sovet dövründə də cinayətkarlığa qarşı mübarizə aparan polis ictimai asayişin təminində aktiv iştirak edib.

"Ulu Öndər Heydər Əliyevin rəhbərliyi dövründə daxili işlər orqanları yüksək peşəkarlıq nümayiş etdirib. Ermənistanın 1988-ci ildən başlayan hərbi təcavüzünə qarşı ilk cavab verənlər də məhz polis qüvvələri olub. Bu mübarizədə 1700-ə yaxın polis və hərbi qulluqçu şəhid olub, 1710 nəfər isə yaralanıb. Göstərdikləri igidliyə görə 67 nəfər Azərbaycanın Milli Qəhrəmanı adına, 1143 nəfər isə orden və medallara layiq görülüb. 1994-cü ildən sonra DİN-də köklü islahatlar aparılıb. 

Prezident İlham Əliyevin rəhbərliyi ilə Daxili İşlər Nazirliyinin fəaliyyəti daha da gücləndirilib, müasir infrastruktur və peşəkar kadr korpusu formalaşıb. Türkiyə ilə əməkdaşlıq çərçivəsində Daxili Qoşunların hazırlıq səviyyəsi yüksəldilib".

Ramiz Alıyev əlavə edib ki, Vətən müharibəsində DİN əməkdaşları mühüm rol oynayıb. 66 şəhid, 346 yaralı verilib. 1690 nəfər orden və medallarla təltif olunub, 4 nəfər Vətən Müharibəsi Qəhrəmanı adına layiq görülüb. 2023-cü ilin sentyabrında Xankəndi ətrafında minaya düşən polislərin həlak olması isə antiterror əməliyyatlarının başlanmasına səbəb olub. Bu əməliyyatda da DİN 20 şəhid verib.

Sədr vurğulayıb ki, Böyük Qayıdış prosesinin sürətləndirilməsi və təhlükəsizliyin etibarlı təmin edilməsi məqsədilə Qarabağ və Şərqi Zəngəzurda polis gecə-gündüz xidmət aparır. Bölgənin silah-sursatlardan, partlayıcı maddələrdən təmizlənməsi işi daxili işlər orqanları əməkdaşlarının əsas fəaliyyət istiqamətlərindən biridir. Hazırda DİN işğaldan azad edilən ərazilərdə müvəqqəti komendantlıqlar vasitəsilə təhlükəsizliyi təmin edir. 1000-dən çox müharibə iştirakçısı polis sıralarına qəbul olunub.

"Kibercinayətkarlıqla Mübarizə Baş İdarəsinin yaradılması bu sahədə yeni mərhələdir. Azərbaycan polisi insan alveri, narkotik dövriyyəsi və transmilli cinayətlərə qarşı mübarizədə nümunə sayılır. Polisə qarşı yönələn qarayaxma kampaniyaları və informasiya hücumları uğursuzluğa məhkumdur. Polisimizin arxasında Azərbaycan xalqı, dövləti və Müzəffər Ali Baş Komandan dayanır". 

Qeyd edək ki, Ümummilli lider Heydər Əliyevin 1998-ci ildə imzaladığı Fərmanla iyulun 2-si Azərbaycan Polisi Günü elan olunub.

Türkan İsgəndərli