Trampın siyasəti Rusiyanın möhkəmlənməsinə xidmət edir - Politoloq
“Qlobal təcrid olunmuşlar alyansı” zəifləyir. Xarici KİV-in məlumatına görə, Suriyada Bəşər Əsəd və Venesuelada Nikolas Maduro rejimlərinin devrilməsi Moskvanın uzun illər dəstək verdiyi müttəfiqlər blokunun tədricən dağılmasını göstərir, amma Kremlin prioriteti Donald Trampla münasibətləri yaxşılaşdırmaqdır.
Maraqlıdır, Kreml xarici siyasətdəki uğursuzluqlarını kompensasiya etmək üçün hansı strateji addımları atacaq və bu, beynəlxalq münasibətlərdə onun mövqeyinə necə təsir edəcək?
Sözügedən mövzu ilə bağlı TodayPress TV-yə danışan siyasi analitik Abutalıb Səmədov bildirib ki, Rusiyanın Ukraynadakı qazancı təskinlikdir:
"Bəşər Əsədin Suriyada hakimiyyətinə son qoyulması Rusiyanın xarici siyasətdə uğursuzluğu sayıla bilər. Ancaq bu, onun Ukraynada əldə etdiyi ərazilər nəticəsində mümkün oldu. Yəni Rusiya Ukraynada müharibəni başlayarkən anlamalı idi ki, onun müəyyən bölgələrdə nüfuzu və gücü azalacaq".
Ekspert qeyd edib ki, Rusiyanın Ukraynada qazandıqları Suriyada itirdiklərindən daha çoxdur:
"Ən azı Rusiya özünə belə bir təskinlik verə bilər. Venesuelada baş verən hadisələr isə ola bilsin ki, Rusiyanın gələcək addımlarına bəhanə yaratsın. Ümumiyyətlə, Trampın yeritdiyi siyasət Rusiyanın əlini zəiflətmir, əksinə gücləndirir. Amerika Birləşmiş Ştatlarında qəbul olunan milli təhlükəsizlik strategiyasında açıq şəkildə yazılıb ki, ABŞ Qərb yarımkürəsini öz əsas təsir zonası hesab edir və digər ərazilərdə də başqa dövlətlərin təsir zonalarını nəzərə almasını mümkün sayır. Həmin strategiyadan çıxan nəticə budur".
Onun sözlərinə görə, Maduronun həbsi və Qrenlandiyanın ələ keçirilməsinə cəhd göstərilməsi Rusiyanın əl-qolunu açır. Ola bilsin ki, Rusiya keçmiş Sovetlər İttifaqının ən azı böyük bir hissəsini öz təsir zonası elan edəcək. Yaxud hansısa ölkədə ABŞ Venesuelada etdiyi kimi hakimiyyət dəyişikliyi etməyə cəhd göstərəcək və bunun üçün artıq əlində kifayət qədər bəhanə olacaq.
A.Səmədov diqqətə çatdırıb ki, NATO-nun zəifləməsi və ABŞ siyasəti Rusiyanın uğuru hesab olunur:
"Eyni zamanda, NATO-nun zəifləməsi Rusiyanın uğurlarından biridir. ABŞ ilə Avropa arasındakı mövcud vəziyyət də Rusiyanın uğuru kimi qiymətləndirilməlidir. Milli təhlükəsizlik strategiyasında açıq şəkildə yazılıb ki, ABŞ NATO-nun genişlənməsinin əleyhinədir. Rusiyanın tələblərindən biri həmişə bu olub və bu da onun uğuru sayılmalıdır. Trampın son bəyanatı və sülh sazişinin imzalanmasında Ukraynanı günahkar sayması da Rusiyanın uğuru kimi dəyərləndirilə bilər".
Analitikin fikrincə, Rusiyanın mövqeyi güclənə bilər:
"Bundan sonra hansı addımlar atıla bilər? Kollektiv Təhlükəsizlik Müqaviləsi Təşkilatının (KTMT) möhkəmlənməsi NATO-nun zəifləməsi fonunda, BRICS-in güclənməsi… Əgər Rusiya bu istiqamətlərdə uğurlara nail ola bilsə, təbii ki, beynəlxalq münasibətlərdə mövqeyi daha da güclənəcək".
Şərhçi sonda vurğulayıb ki, bütövlükdə, indiki şəraitdə Rusiyanın beynəlxalq nüfuzunun azalması görüntüsü varsa, mən hesab edirəm ki, bu dəyişə bilən bir vəziyyətdir. Təəssüf ki, Trampın siyasəti Rusiyanın möhkəmlənməsinə xidmət edir.
Jalə Rövşən
