"Venesuela ssenarisi cəfəngiyyatdır!" - Ukrayna bölüşdürüldü: Gizli "Centlmen sazişi"...
Rusiya Təhlükəsizlik Şurasının sədr müavini Dmitri Medvedev bildirib ki, ABŞ Ukraynada Venesuelada tətbiq etdiyi ssenarini təkrarlaya bilər. Onun sözlərinə görə, Ukrayna məsələsində Vaşinqtonun belə addımlar atması üçün daha çox əsas mövcuddur. Medvedev bunu Ukraynanın ABŞ Prezidenti Donald Trampla mümkün razılaşmanı rədd etməsi ehtimalını şərh edərkən deyib.
Maraqlıdır, ABŞ-nin Ukraynada Venesuela ssenarisini təkrarlaması realdırmı və bu, beynəlxalq hüquq baxımından hansı nəticələrə gətirib çıxara bilər?
Sözügedən məsələ ilə bağlı TodayPress TV-yə danışan politoloq Tofiq Abbasov bildirib ki, ABŞ-nin Ukraynada hərəkətləri Venesuela modelindən fərqlidir:
"Amerikanın Ukraynada Venesuela ssenarisini təkrarlaması qeyri-mümkündür. Bunun bir neçə səbəbi var. İlk növbədə, bu iki ölkə arasında böyük fərqlər mövcuddur. Ukrayna müharibənin alovuna qərq olunmuş ölkədir və Amerikanın orada diplomatiyası demək olar ki, heç bir nəticə verə bilməyib. Tramp nə qədər “sülh” çağırışı etsə də, buna nail ola bilmədi və bu prosesdə başa düşdü ki, Rusiya onun dediklərinə əməl etməyəcək, Ukrayna isə belə bir iqtidarda deyil ki, onun istədiyi nəticəni əldə edə bilsin".
Analitik qeyd edib ki, ABŞ qitəsində üstünlük saxlayır:
"Fərqlər nədən ibarətdir? Birincisi, ABŞ Ceyms Monro doktrinasına əsaslanır. 1823-cü ildə prezident Ceyms Monro avropalılara müraciət edərək demişdi: “Siz öz qitənizdə prosesləri həll edin, mənim işimə müdaxilə etməyin, mən isə Amerika qitəsində – şimalda da, cənubda da – kimlə nə edəcəyimi özüm bilərəm"".
Onun sözlərinə görə, indi yeni dünya nizamı formalaşır və Vaşinqton çalışır ki, Qərb yarımkürəsində öz hökmranlığını gücləndirsin. Təsadüfi deyil ki, Tramp Kubanı, sonra Kolumbiyanı və digər sosialist yönümlü ölkələri xəbərdar edir ki, hazırlaşın, sizin də evinizə biz gələ bilərik.
Politoloq vurğulayıb ki, Ukraynada tam fərqli ssenari işlənir:
"Rusiya, baxmayaraq ki, Alyaskada Trampla Putinin görüşü baş tutdu, heç vaxt Amerikanın dediklərinə əməl etməyəcək və öz istəyinə nail olacaq. Arada qalan, ən ağır şəraitdə yaşayan Ukrayna xalqıdır ki, onların əzab və çətinliklərindən digər böyük dövlətlər öz maraqlarını Şərqi Avropada genişləndirmək üçün istifadə edirlər. Zelenski burada ciddi səhvlərə yol verir".
Ekspertin fikrincə, Tramp Ukraynaya dəstəyi yalnız ödənişlə şərtləndirir:
"Avropa ona heç vaxt Ukraynada özünü təminatlı hiss etməsi üçün lazım olan imkanları verməyəcək. Tramp bunu yaxşı başa düşür və ona görə öz mövqeyini kənara çəkərək deyir ki, “Əgər Avropa Ukraynaya dəstək vermək istəyirsə, öz resurslarından ayırsın. Məndən silah istəyirsə, onu satacağam, alıcılıq qabiliyyətin varsa, gəl al"".
Onun sözlərinə görə, Tramp Venesuelaya müdaxilə etməklə enerji resursları uğrunda gedən amansız müharibədə öz mövqeyini möhkəmləndirdi. ABŞ bu ölkəyə böyük investisiya qoyan Rusiyanın və Çinin təsirini aradan qaldırmaq istəyir və Venesuelanı öz təsir dairəsində saxlamaq niyyətindədir.
T.Abbasov bildirib ki, Medvedevin iddiaları əsassızdır:
"Rusiya istədiyinə nail olacaq və Zelenskinin səhvləri onun ərazi itkilərini qaçılmaz edəcək. Hazırda Moskva ilə Vaşinqton arasında centlmenləşmiş danışıqlar aparılır: “Mən sənə mane olmuram, sən də mənə mane olmursan.” Alyaskadakı danışıqlar da bu zəmində baş tutub".
Politoloq sonda qeyd edib ki, ABŞ Amerikanı və yaxın bölgələri nəzarətində saxlayır:
"Amerika eyni zamanda İran və Yaxın Şərqdə təsir imkanlarını məhdudlaşdıracaq. ABŞ yaxın gələcəkdə Cənubi və Şimali Amerikada, eləcə də Qrenlandiya və Kanadada bütün imkanları öz nəzarətinə götürməyi planlaşdırır. Medvedevin iddiaları isə, bir daha qeyd edək, cəfəngiyyatdan başqa bir şey deyil və onun heç bir əsası yoxdur".
Jalə Rövşən
