Suverenlik Günü: Qələbəni mümkün edən amillər nələr idi?

Vətən müharibəsi başa çatdıqdan və Ermənistan tərəfindən kapitulyasiya aktı imzalandıqdan sonra Rusiya sülhməramlılarının müvəqqəti yerləşdirildiyi ərazilərdə mövcud olan qanunsuz silahlı qruplar, 30 il ərzində qurulmuş müdafiə sistemləri və istehkamlar, depolanmış silah-sursat, o cümlədən texnika, cəmi 23 saat ərzində darmadağın edildi.

Maraqlıdır, Azərbaycan Silahlı Qüvvələrinin 1 gün ərzində bütün bu hazırlıqları məhv etməsi və düşməni təslim olmağa məcbur etməsi hansı amillər hesabına mümkün oldu?

“Ermənistan müharibədən sonra üzərinə götürdüyü öhdəlikləri yerinə yetirmirdi”

Bu barədə TodayPress TV-yə Silahlı Qüvvələrin ehtiyatda olan zabiti, hərbi ekspert Ədalət Verdiyev danışıb.

Onun sözlərinə görə, Ermənistan müharibədən sonra üzərinə götürdüyü öhdəlikləri yerinə yetirmirdi. Azərbaycanın dəfələrlə etdiyi sülh çağırışları nəticəsiz qalır, əksinə, Rusiya sülhməramlılarının müvəqqəti yerləşdirilməsindən istifadə edərək ərazilərimizə silah-sursat, mina və texnika daşıyırdı. Bunlar isə hərbi təxribatlar zamanı erməni silahlıları tərəfindən Azərbaycana qarşı istifadə olunurdu.

“Faydalı qazıntı yataqları qanunsuz istismar olunurdu”

Ekspert bildirib ki, 2023-cü ilin aprelindən etibarən, erməni təxribatları daha da intensivləşmişdi. Rusiya kontingenti də Azərbaycan ərazilərinə silah-sursat daşınmasına şərait yaradır, digər tərəfdən, faydalı qazıntı yataqları qanunsuz istismar olunurdu. Azərbaycan sərhəd-keçid məntəqəsi qurmaqla bu daşınmaların qarşısını alsa da, Rusiya sülhməramlıları nə erməni silahlılarını tərksilah etdi, nə də onları ərazilərimizdən çıxardı. Antiterror əməliyyatına qədər bu ərazilərdə 10 minədək erməni silahlısı mövcud idi və onlar hərbi təxribatlar törətməkdə davam edirdilər.

“Mövqelərimizi atəşə tutur, ərazilərimizi minalayır, istehkam qurğuları inşa edir...”

Ədalət Verdiyev, həmçinin qeyd edib ki, separatçı rejim “Prezident seçkiləri” keçirir, qondarma parlament adından bəyanatlar verir, mövqelərimizi atəşə tutur, ərazilərimizi minalayır, istehkam qurğuları inşa edirdi. Ermənistan istehsalı olan minalar mülki şəxslərimizin, polis və hərbi qulluqçularımızın həyatına son qoyur, yaralanmalara səbəb olurdu.

“Belə şəraitdə Ali Baş Komandan 2023-cü il sentyabrın 19-da konstitusiya quruluşunun bərpası məqsədilə lokal antiterror əməliyyatlarının başlanması barədə əmr verdi. Cəmi bir gün davam edən əməliyyatlarda separatçılar təslim oldular, kapitulyasiya aktı imzaladı və qeyri-qanuni silahlı dəstələr silahı yerə qoyaraq mövqelərini tərk etdilər”, – deyə hərbi ekspert vurğulayıb.

Onun sözlərinə görə, sentyabrın 28-də, əməliyyatlardan 8 gün sonra Samvel Şahramanyan qondarma rejimin ləğvi ilə bağlı sənəd imzaladı. Ardınca isə Ermənistan ordusunun Azərbaycan ərazisində qalan hissələrinin çıxarılması başa çatdı və Qarabağda qeyri-qanuni rejim tamamilə ləğv edildi.

Ekspert onu da əlavə edib ki, separatçıların rəhbərləri həbs edildi, antiterror əməliyyatı nəticəsində Azərbaycanın dövlət suverenliyi tam təmin olundu:

“Əsgərlərimiz Xankəndi, Xocalı, Ağdərə, Xocavənd və Əsgəranda üçrəngli bayrağımızı ucaltdılar. Ərazi bütövlüyümüz tam bərpa olundu. Nəhayət, Ali Baş Komandan İlham Əliyev zəfərin üçüncü ildönümünə həsr olunmuş hərbi paradı Xankəndidə keçirməklə Azərbaycanın möhtəşəm qələbəsini bütün dünyaya bəyan etdi”.

Nicat Osman