Rusiya təzə Paskeviç tapsa, İrəvana daxil olacaq - Analitik təhlil

Ermənistanda bazar günü keçirilən parlament seçkiləri ölkənin Avropa İttifaqına yaxınlaşma kursunu gücləndirə biləcək nəticə ilə yekunlaşdı. Bu isə hökumətin son illərdə seçdiyi siyasi xəttə narazılıq bildirən Rusiyanın mövqeyinə baxmayaraq baş verdi. Ermənistanın Baş naziri Nikol Paşinyan bazar ertəsi qələbəsini elan etdi.

Bazar ertəsi səhər keçirdiyi mətbuat konfransında Paşinyan rəhbərlik etdiyi “Vətəndaş Müqaviləsi” Partiyasının qalib gəldiyini bildirərək bunu “tarixi qələbə” adlandırdı.

Seçkilərdə Paşinyanın əsas rəqibi Rusiyaya yaxın mövqeyi ilə tanınan “Güclü Ermənistan” bloku oldu. Siyasi müşahidəçilər bu seçkiləri həm də Paşinyanın Azərbaycanla sülh siyasətinə münasibətin göstəricisi kimi qiymətləndirdilər.

Seçkiqabağı sorğular Paşinyanın partiyasının 32 faizə qədər dəstəyə malik olduğunu, “Güclü Ermənistan”ın isə təxminən 11 faiz topladığını göstərirdi.

Analitiklər hesab edirlər ki, nəticələr Paşinyanın 2018-ci ildə hakimiyyətə gəldikdən sonra Ermənistanı Qərbə yaxınlaşdırmaq siyasətinə müəyyən ictimai dəstəyin olduğunu nümayiş etdirir. Bunun əksinə olaraq, ötən il yaradılan və Samvel Karapetyanın rəhbərlik etdiyi “Güclü Ermənistan” bloku ölkənin Rusiyaya yaxın qalmasının tərəfdarıdır. Rusiya Ermənistan üçün əsas ticarət tərəfdaşlarından və enerji təchizatçılarından biri hesab olunur. Seçki kampaniyası dövründə mediada Gümrü şəhərində “Güclü Ermənistan” blokunun qərargahlarında axtarışların aparıldığı və bir neçə nəfərin saxlanıldığı barədə məlumatlar yayılmışdı.

Ermənistanın Avropa ilə yaxınlaşması Moskvanın narazılığına səbəb olub. Ötən ay Rusiya Prezidenti Vladimir Putin Ermənistanın Moskvanın təsir dairəsindən uzaqlaşmasının ölkə iqtisadiyyatı üçün mənfi nəticələr yarada biləcəyi ilə bağlı xəbərdarlıq etmişdi. Seçkilər ərəfəsində Rusiya Ermənistandan idxal olunan bəzi məhsullara, o cümlədən gül və tərəvəzlərə yeni məhdudiyyətlər tətbiq edib. Putin həmçinin, bildirmişdi ki, Ermənistan da Ukraynanın yaşadığına bənzər böhranla üzləşə bilər və qeyd etmişdi ki, Kiyevin problemləri “Avropa İttifaqına inteqrasiya cəhdləri ilə başlayıb”.

Avropa Komissiyasının Prezidenti Ursula fon der Lyayen isə Moskvanı iqtisadi münasibətlərdən siyasi təzyiq vasitəsi kimi istifadə etməkdə ittiham edib. O, Ermənistana 50 milyon avro maliyyə dəstəyi ayrılacağını və Rusiyanın məhdudiyyət tətbiq etdiyi məhsullar üçün daha əlverişli ticarət şərtlərinin yaradılacağını açıqlayıb. Paşinyanın Azərbaycanla sülh siyasəti seçki kampaniyasının əsas mövzularından biri olub. Müxalifət və cəmiyyətin müəyyən hissəsi onu Azərbaycana həddindən artıq güzəştə getməkdə ittiham edib.

Qiymət Mahir