Bu dəfə “Sülh Körpüsü” təşəbbüsü Qəbələyə çatdı — Fərhad Məmmədov
"Aprelin 10–12-də Qəbələ şəhərində Azərbaycan və Ermənistan vətəndaş cəmiyyəti nümayəndələrinin “Sülh Körpüsü” təşəbbüsü çərçivəsində həyata keçirilən dördüncü görüşü baş tutub. Ermənistandan olan iştirakçılar bütün qanuni prosedurlara riayət etməklə Qazaxda quru sərhədini keçib, avtobusla Gəncəyə gəlib, Gəncədən Qəbələyə qatarla yollanıb, geri isə avtobusla qayıdıblar. Bu marşrut Qazax, Ağstafa, Tovuz, Göylar, Şəmkir, Gəncə, Yevlax, Ağdaş və, əlbəttə ki, Qəbələ şəhərlərindən keçidi əhatə edib".
Bu sözləri Cənubi Qafqaz Tədqiqatlar Mərkəzinin direktoru Fərhad Məmmədov TodayPress TV-yə açıqlamasında deyib.
Onun sözlərinə görə, 4 diskussiya sessiyası, Azərbaycan Respublikasının Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev ilə görüş və mətbuat konfransı keçirilib. Qeyri-rəsmi ünsiyyətə də geniş vaxt ayrılıb:
"Müzakirələr əsasən regiondakı proseslər, qonşuluqda baş verən müharibələr nəticəsində artan qeyri-müəyyənliklər, daxili və xarici amillərin sülh prosesinə təsiri ətrafında aparılıb. Ayrı-ayrı sessiyalar təşəbbüs iştirakçılarının öz ölkələrində fəaliyyəti, iki ölkə cəmiyyətlərinin sülh gündəliyini necə qəbul etməsi, sülh üçün maneələr və imkanlara həsr olunub. Həmçinin sülh prosesinin növbəti mərhələsində qarşılıqlı fəaliyyətin forması ilə bağlı fikir mübadiləsi aparılıb.
Əlbəttə ki, sülh gündəliyini müəyyən edən əsas amil bu gündəliyi razılaşdıran iki ölkə hökumətlərinin legitimliyidir. İyun ayının əvvəli bu legitimliyin nə dərəcədə davamlı olacağını və vətəndaş cəmiyyəti nümayəndələrinin hansı şərtlər çərçivəsində birgə fəaliyyətini davam etdirə biləcəyini göstərməlidir. Bu amil sülh prosesinin təməlidir və prosesin geri çevrilə bilən olub-olmayacağı sualına cavab verməlidir".
F.Məmmədov bildirib ki, belə görüşlərin keçirilməsi bir-birini anlamağa, reallıqlarla tanış olmağa və gələcək addımları müəyyən etməyə imkan verir:
"Bu gün demək olar ki, sülh gündəliyi daha aydın çərçivə qazanır və real perspektivlər formalaşır. Diskussiyalar çərçivəsində münaqişənin dərin travmaları, həssas mövzular və cəmiyyətlərin sülhə hazırlığı nəzərdən keçirilir. Məhz belə səmimi və etimadlı müzakirələr vasitəsilə irəliyə doğru hansı istiqamətlərdə hərəkət etməyin mümkün olduğu müəyyənləşir. Hamıya aydındır ki, bu, səbir, ardıcıllıq və dözüm tələb edən uzun bir yoldur.
Sülh prosesinin dinamikası yüksəkdir, mövcud şəraitdə mümkün olan hər şey edilir. Vətəndaş cəmiyyəti də bu prosesin tərkib hissəsidir və öz rolunu müəyyən etməyə çalışır, həm birgə fəaliyyət göstərir, həm də öz ölkələrində fəaliyyətini həyata keçirir".
Qiymət Mahir
