ÜST xəbərdarlıq etdi: Yeni virus sürətlə yayılır
Ümumdünya Səhiyyə Təşkilatı (ÜST) 20 il əvvəl Hind Okeanında baş verən böyük epidemiyadan əvvəl müşahidə olunan erkən xəbərdarlıq siqnallarının eynisini yenidən aşkar etdiyini bildirərək, bənzər bir sağlamlıq böhranının təkrarlanmaması üçün təcili tədbirlərin görülməsinə çağırıb.
TodayPress TV xəbər verir ki, bu barədə "Reuters" məlumat yayıb.
ÜST-ün texniki eksperti Diana Rojas Alvarezin sözlərinə görə, Çikungunya virusu geniş şəkildə tanınmasa da, bu günə qədər 119 ölkədə qeydə alınıb və dünya üzrə 5,6 milyard insanı risk altına salır. Virus şiddətli oynaq ağrıları və yüksək qızdırma ilə müşayiət olunur, bəzi hallarda isə ölümlə nəticələnə bilər.
Alvarez, 2004–2005-ci illərdə Hind Okeanındakı kiçik ada dövlətlərindən yayılaraq qlobal epidemiyaya çevrilən Çikungunya dalğasını xatırladaraq, hazırkı vəziyyətin həmin dövrlə eyni yoluxma nümunələri göstərdiyini vurğulayıb.
“2025-ci ilin əvvəlindən etibarən Reunion, Mayott və Mavrikiy adalarında genişmiqyaslı Çikungunya epidemiyaları qeydə alınıb. Reunion adasında əhalinin üçdə birinin virusa yoluxduğu ehtimal olunur”, – deyə o qeyd edib.
ÜST-ün məlumatına görə, virus hal-hazırda Afrikanın Madaqaskar, Somali və Keniya kimi ölkələrinə yayılır. Cənubi Asiyada isə artıq epidemik səviyyədə yoluxmalar müşahidə olunur.
Hind Okeanı adalarındakı vəziyyətin təsiri ilə Avropada da idxal olunmuş hallar aşkarlanıb. Fransada lokal yoluxma təsdiqlənib, İtaliyada isə şübhəli hallar qeydə alınıb.
Töhfə Səməd
