Meyvə və tərəvəz yuxu keyfiyyətini artırır

Yeni araşdırma göstərib ki, gün ərzində daha çox meyvə və tərəvəz yeyən insanlar həmin gecə daha keyfiyyətli və dərin yuxu keçirirlər. 

TodayPress TV xəbər verir ki, bu nəticə "Sleep Health" adlı tibb jurnalında dərc olunub.

Çikaqo Universiteti Tibb Mərkəzi və Kolumbiya Universitetinin alimləri tərəfindən aparılan araşdırmada, gənc və sağlam iştirakçılar gündəlik qida qəbulunu mobil tətbiqlərlə qeyd ediblər və biləyə taxılan cihazlar vasitəsilə yuxu nümunələri obyektiv şəkildə izlənilib. Əsas diqqət “yuxunun parçalanması” — yəni gecə ərzində tez-tez oyanma və ya dərin yuxudan yüngül yuxuya keçid hallarına yönəlib.

Tədqiqatçılar müəyyən ediblər ki, iştirakçıların gün ərzində qəbul etdiyi qidaların miqdarı və keyfiyyəti onların gecə yuxusunun dərinliyi və fasiləsizliyi ilə sıx bağlıdır. Meyvə, tərəvəz və xüsusilə tam taxıl kimi sağlam karbohidratlar qəbul edənlərdə yuxu daha dərin və ardıcıl olub.

Statistik modelləşdirmə nəticəsində alimlər belə qənaətə gəliblər ki, gündə meyvə və tərəvəz yeyən insanların yuxu keyfiyyəti, bu məhsulları qəbul etməyənlərlə müqayisədə 16 faiz yüksəkdir.

Qiymət Mahir