İspan alimlər alkoqol asılılığını azaldan yeni birləşmə kəşf etdilər

Miqel Ernandes Universitetinin alimləri MCH11 adlı birləşmə hazırlayıblar ki, bu maddə həm erkək, həm də dişi siçanlarda alkoqol qəbuluna olan istəyi əhəmiyyətli dərəcədə azaldır.

TodayPress TV xəbər verir ki, tədqiqatın nəticələri “Biomedicine & Pharmacotherapy (BioPharm)” jurnalında dərc olunub.

Alkoqoldan asılılıqla bağlı pozğunluqlar hər il dünyada 2,6 milyon nəfərin ölümünə səbəb olur və terapiyadan sonra xəstələrin 70 faizə yaxını bir il ərzində yenidən asılılığa qayıdır. Alimlərin sözlərinə görə, mövcud dərmanların əksəriyyəti yan təsir yaradır və alkoqola meyilliliyin əsas səbəbini aradan qaldırmır.

Araşdırma komandası zövq, motivasiya və stressi tənzimləyən endokannabinoid sisteminə fokuslanıb. Alkoqolizm zamanı bu sistemin balansı pozulur və impulsları idarə edən 2-araşidonoyilqliserin (2-AG) molekulunun səviyyəsi azalır.

MCH11 isə monoasilqliserol-lipaza adlı fermenti bloklayaraq onun 2-AG-ni parçalamağının qarşısını alır. Nəticədə, beynin 2-AG səviyyəsi artır, bu isə alkoqol qəbuluna olan istəyi zəiflədir və abstinensiya simptomlarını yüngülləşdirir.

Təcrübələr göstərib ki, cins fərqi müalicəyə təsir edir — erkək siçanlarda az dozalar kifayət etdiyi halda, dişilərdə daha yüksək dozalar tələb olunur. Gen ifadəsinin analizi də göstərib ki, MCH11 alkoqolun səbəb olduğu genetik pozğunluqları hər iki cinsdə bərpa edir.

Ən güclü effekt MCH11 ilə artıq alkoqolizmin müalicəsində istifadə edilən topiramat dərmanının birgə tətbiqi zamanı əldə edilib. Alimlər hesab edirlər ki, bu birləşmə gələcəkdə fərdiləşdirilmiş terapiya yanaşmasının bir hissəsinə çevrilə bilər. Lakin Mansanaresin sözlərinə görə, onu klinik praktikaya tətbiq etmək üçün hələ uzun elmi sınaqlar tələb olunur.

Qiymət Mahir