Çətin uşaqlıq keçirmiş insanların da yaxşı valideyn ola biləcəyi bildirilir.
TodayPress TV "Haber Türk"ə istinadən xəbər verir ki, mütəxəssislərin fikrincə, uşaqlıq dövründə yaşanan travmalar valideynliyə təsir etsə də, bu dövrü qırmaq mümkündür.
Araşdırmalara görə, pis valideyn davranışlarına yalan, manipulyasiya, daimi tənqid, qışqırıq, fiziki və emosional zorakılıq daxildir. Bu cür mühitdə böyüyən uşaqlarda gələcəkdə psixoloji problemlər, xroniki xəstəliklər, stress pozğunluğu və asılılıq riski arta bilər.
Mütəxəssislər bildirir ki, mənfi uşaqlıq təcrübələri valideyn olduqdan sonra həddindən artıq sərt və ya həddindən artıq icazəverici davranışlara səbəb ola bilər. Bunun qarşısını almaq üçün özünü tanımaq, psixoloji dəstək almaq, uşaqlarla sağlam sərhədlər qurmaq və kiçik müsbət addımlarla irəliləmək tövsiyə olunur.
Qeyd olunur ki, yaxşı valideynlər səhvlərini etiraf edir, uşağa emosional yük qoymur, vaxt ayırır və münasibətdə səbirli olmağa çalışırlar. Mütəxəssislər vurğulayır ki, mükəmməl valideyn olmaq deyil, davamlı şəkildə daha yaxşısını etməyə çalışmaq əsasdır.
Nəticə olaraq, keçmişdə yaşanan çətinliklərə baxmayaraq, uşaqlar üçün təhlükəsiz, sevgi dolu və sabit mühit yaratmağın mümkün olduğu bildirilir.
Jalə Rövşən
