Rusiya Kiyevdə Azərbaycan səfirliyinin zədələnməsinə görə təəssüfünü bildirdi
Azərbaycanın Rusiyadakı səfiri Rəhman Mustafayev Rusiya xarici işlər nazirinin müavini Mixail Qaluzin ilə görüşüb.
TodayPress TV xəbər verir ki, bu barədə Rusiya Xarici İşlər Nazirliyi məlumat yayıb.
Bildirilib ki, söhbət zamanı 14 noyabrda Azərbaycan tərəfindən Kiyevdəki Azərbaycan diplomatik nümayəndəliyinin binalarına, əmlakına və ərazisinə dəyən ziyanla bağlı daxil olan müraciətin səlahiyyətli Rusiya qurumları tərəfindən diqqətlə araşdırıldığı qeyd olunub.
Rusiya tərəfi baş vermiş hadisə ilə bağlı səmimi təəssüfünü bildirib.
Eyni zamanda, mövcud məlumatların nəzərdən keçirilməsi nəticəsində müəyyən edilib ki, Kiyevdəki Azərbaycan diplomatik nümayəndəlik kompleksinə dəyən ziyan çox güman Ukrayna Silahlı Qüvvələrinin Hava Hücumundan Müdafiə sistemlərinin nasazlığı, ehtimal ki, “Patriot” raketinin zərbəsi nəticəsində baş verib.
Azərbaycan tərəfinə bir daha bildirilib ki, “xüsusi hərbi əməliyyat” zamanı Rusiya Silahlı Qüvvələri Kiyevdə yerləşən obyektlər, o cümlədən Ukrayna müdafiə sənayesi obyektləri də daxil olmaqla, qanuni hərbi hədəflərə zərbələr endirir. Zərbələr planlaşdırılarkən mülki şəxslərə zərər dəyməməsi üçün döyüş məlumatları diqqətlə izlənilir və xarici diplomatik nümayəndəliklərin yerləşdiyi ərazilər nəzərə alınır. Bu kontekstdə, “Ukraynadakı Azərbaycan obyektlərinə qarşı iddia edilən “məqsədli raket zərbələri”nin həqiqətə uyğun olmadığı xüsusilə” vurğulanıb.
Qaluzin Ukrayna hakimiyyətini beynəlxalq humanitar hüququ pozaraq yaşayış məntəqələrində hava hücumundan müdafiə sistemləri də daxil olmaqla hərbi qurğular yerləşdirməyə davam etməkdə və bununla da mülki əhalini təhlükəyə atmaqda ittiham edib: “Rusiya tərəfi hesab edir ki, bu cür cinayətkar hərəkətlərin hər hansı bir nəticəsinə görə Ukraynanın hərbi və siyasi rəhbərliyi məsuliyyət daşımalıdır”.
Tərəflər 22 fevral 2022-ci ildə Moskvada imzalanmış Rusiya Federasiyası və Azərbaycan Respublikası arasında Müttəfiqlik Əməkdaşlığı haqqında Bəyannaməyə uyğun olaraq ikitərəfli əlaqələrin inkişaf etdirilməsinə qarşılıqlı sadiqliklərini bir daha təsdiqləyiblər. Yüksək səviyyəli əlaqələrin qrafiki müzakirə edilib. İkitərəfli iqtisadi əməkdaşlığın inkişafında əldə edilən uğurlar və mədəni və humanitar əlaqələrin tam bərpasının vacibliyi qeyd edilib.
Rusiya tərəfi ikitərəfli münasibətlərin normallaşdırılması istiqamətində əhəmiyyətli bir addım olaraq, bu ilin 30 iyun-1 iyul tarixlərində Bakıda saxlanılan 11 Rusiya vətəndaşının tezliklə azad edilməsinin vacibliyini vurğulayıb.
Həmçinin regional məsələlər, o cümlədən 2020-2022-ci illərdə əldə edilmiş üçtərəfli yüksək səviyyəli razılaşmalar əsasında Azərbaycan-Ermənistan münasibətlərinin normallaşdırılmasında Rusiyanın mümkün köməyi müzakirə edilib. "3+3" Regional Əməkdaşlıq Platformasının rahat fəaliyyətinin təmin edilməsi ilə bağlı məsələlər də müzakirə edilib.
Qeyd edək ki, 14 noyabr tarixində təqribən gecə saat 01:00-da Ukraynanın paytaxtı Kiyev şəhərinə raket və dron hücumları nəticəsində İsgəndər tipli raketlərdən biri Azərbaycan səfirliyinin ərazisinə düşüb. Bununla bağlı Rusiya Federasiyasının Azərbaycan Respublikasındakı fövqəladə və səlahiyyətli səfiri Mixail Yevdokimov Xarici İşlər Nazirliyinə çağırılıb, ona kəskin etiraz bildirilib və müvafiq nota təqdim edilib.
