Ukrayna Yunanıstandan qaz alacaq
Ukrayna Prezidenti Volodimir Zelenski Yunanıstana səfəri zamanı Baş nazir Kiriakos Mitsotakis ilə görüşüb və iki ölkə arasında yeni enerji razılaşmaları imzalanıb.
TodayPress TV xəbər verir ki, bu barədə Zelenski sosial mediada açıqlayıb.
Ukrayna ilə Yunanıstan arasında təbii qaz tədarükü barədə müqavilə hazırlanıb. Bu saziş qış aylarında Ukraynanın qaz idxalını daha təhlükəsiz etmək məqsədi daşıyır və ölkəyə əlavə tədarük marşrutu açır.
Prezident bildirib ki, qaz idxalının maliyyələşdirilməsi üçün lazım olan təxminən 2 milyard avro artıq təmin edilib. Bu vəsait Rusiyanın hücumları nəticəsində Ukraynanın enerji istehsalında yaranan itkiləri kompensasiya etməyə kömək edəcək. Zelenski Avropa ölkələrinin, Avropa və Norveç banklarının, həmçinin ABŞ-nin bu prosesə dəstək verdiyini söyləyib.
Ukrayna və Yunanıstan gələn aydan 2026-cı ilin mart ayına qədər ABŞ-dən mayeləşdirilmiş təbii qaz (LNG) idxalı üçün müqavilə imzalayıb. Müqavilə Yunanıstanın dövlət qaz şirkəti DEPA Commercial ilə Ukraynanın Naftogaz şirkəti arasında bağlanıb.
Sazişin regionda enerji təhlükəsizliyi və dayanıqlıq üçün mühüm əhəmiyyət daşıdığı vurğulanıb.
Türkan İsgəndərli
