Suriya liderindən dünyaya xəbərdarlıq: “Bu dəfə məzhəb savaşı başlaya bilər”
Suriyanın keçid dövrü prezidenti Əhməd Əl Şaraa ölkəsinin yeni məzhəb qarşıdurmasına və yeni müharibəyə tab gətirə bilməyəcəyini bildirib.
TodayPress TV bu barədə xarici mediaya istinadən xəbər verir.
O qeyd edib ki, Suriya xalqı uzun illər davam edən müharibənin yaralarını hələ tam sağaltmayıb və hazırda ölkənin əsas ehtiyacı sabitlikdir.
Əl Şaraanın sözlərinə görə, Suriyada yeni yolların, körpülərin, enerji infrastrukturunun tikintisinə, su probleminin həllinə və xarici sərmayələrin cəlb edilməsinə ehtiyac var. O vurğulayıb ki, bütün bunların həyata keçirilməsi üçün ölkədə sabit mühit formalaşmalıdır.
O, həmçinin Suriyada bütün icmaların hüquqlarının təmin edilməsinin, ölkənin ərazi bütövlüyünün qorunmasının və vahid dövlət kimi inkişaf etməsinin vacibliyini qeyd edib.
Əhməd Əl Şaraa bildirib ki, Hizbullah Suriyaya ciddi ziyan vurub. Bununla belə, təşkilata qarşı yeni hərbi qarşıdurmanın yenidən məzhəb savaşına çevrilə biləcəyini deyərək, belə bir ssenarinin qarşısının alınmasının vacibliyini vurğulayıb.
“Biz hesab edirik ki, şiə və sünni ayrı deyil, birdir. Livandakı şiələrin və ölkəmizdə yaşayan şiələrin hüquqları görməzdən gəlinə bilməz”, - deyə o əlavə edib.
