Qırğızıstanda yarım milyondan çox insan səs verdi

Qırğızıstanda parlament seçkilərində dörd saatlıq səsvermə ərzində seçicilərin iştirak faizi 12,07%-ə çatıb, yarım milyondan çox insan səs verib.

TodayPress TV xəbər verir ki, bu göstəriciləri ölkənin Mərkəzi Seçki Komissiyasının avtomatlaşdırılmış informasiya seçki sistemi açıqlayıb.

Məlumata əsasən, yerli vaxtla saat 12:00-a olan nəticələrə görə, seçki məntəqələrinə 518 min nəfər gəlib ki, bu da ümumi seçicilərin 12,07%-ni təşkil edir. Ən yüksək fəallığı ölkənin Batken vilayəti nümayiş etdirib (seçicilərin 16%-i məntəqələrə gəlib). Ən az iştirak isə paytaxtda qeydə alınıb. Bəzi məntəqələrdə iştirak 8%-ə belə çatmayıb.

Qırğızıstan parlamentinin deputatları sentyabrın 25-də qanunverici orqanın özünü buraxması barədə yekdilliklə səs veriblər. Prezident Sadır Japarov isə noyabrın 30-da növbədənkənar seçkilərin keçirilməsi haqqında fərman imzalayıb.

Yeni qaydalara əsasən, ölkədə 30 çoxmandatlı ərazi seçki dairəsi yaradılıb və hər dairədən üç deputat seçilir. MSK-nın məlumatına görə, bu seçkilərdə parlamentin 90 yeri uğrunda ümumilikdə 460 nəfər mübarizə aparır. Respublikanın seçici siyahılarına isə təxminən 4,3 milyon insan daxil edilib.