Krıma kütləvi hücum: Qatar hərəkəti dayandırıldı, ölənlər var

Krım Dəmir Yolu bəzi istiqamətlərdə sərnişin qatarlarının hərəkətini hava təhlükəsi səbəbindən müvəqqəti dayandırıb.

TodayPress TV xəbər verir ki, bu barədə sərnişindaşıma şirkəti olan “Qrand Servis Ekspress” məlumat yayıb.

Məlumatda bildirilir ki, hərəkətin məhdudlaşdırıldığı sahələrdə olan qatarların sərnişinləri təhlükəsizlik məqsədilə vaqonlardan təxliyə ediliblər.

Moskva vaxtı ilə saat 07:00-a olan məlumata görə, həm Krıma gedən, həm də yarımadadan çıxan ümumilikdə 12 sərnişin qatarı gecikir.

Ən uzun gecikmənin beş saata çatdığı qeyd olunur.

Qeyd edək ki, iyunun 4-nə keçən gecə Krım Ukrayna Silahlı Qüvvələrinin kütləvi hücumuna məruz qalıb.

Məlumata görə, Sevastopol şəhərində, Şimal hissəsi, Streletskaya buxtası və İnkerman ərazisində 20-dən çox hava hədəfi məhv edilib.

İlkin məlumata əsasən, Sevastopolun Şimal hissəsində yerləşən bağçılıq sahəsində vurulan pilotsuz uçuş aparatının qalıqları yerə düşüb. Fruktovoye kəndində isə fərdi yaşayış evinin fasadına ziyan dəyib.

Simferopolda qeyri-yaşayış obyektlərinə endirilən zərbə nəticəsində üç nəfər həlak olub, yeddi nəfər isə yaralanıb.

Qiymət Mahir