İspaniya Avropa İttifaqı ölkələrini “eqoistlik”də günahlandırdı

İspaniyanın Baş naziri Pedro Sançes ölkənin Seuta anklavında yaşanan miqrasiya böhranı ilə bağlı bir sıra Avropa İttifaqı ölkələrini tənqid edib.

TodayPress TV xəbər verir ki, Sançes Aİ liderlərinə göndərdiyi məktubda bəzi ölkələrin mövqeyini “eqoist, qütbləşdirici və hüquqa zidd” yanaşma kimi qiymətləndirib. O, Aİ-nin 27 üzv ölkəsinin daxili işlər nazirlərinin təcili görüşünün keçirilməsinə çağırıb.

İspaniyanın daxili işlər naziri Fernando Qrande-Marlaska bildirib ki, Mərakeşlə Seuta arasındakı sərhədi keçməyə cəhd edən zaman azı 67 nəfər ölüb.

Məlumata görə, Seutaya kütləvi şəkildə daxil olan miqrantların əksəriyyəti şənbə gününə qədər Mərakeşə geri qayıdıb. Rəsmi məlumatlara əsasən, on minlərlə insan sərhədi keçib. Onların bir çoxu sərhəd maneələrindən yan keçərək dəniz yolu ilə üzərək Seutaya daxil olub.

Bununla yanaşı, Aİ-nin 27 ölkəsindən 22-si daxili işlər nazirlərinin təcili videokonfransının keçirilməsi təşəbbüsünü dəstəkləyib. Birgə məktubda böhrana koordinasiyalı cavab verilməsi və sərhədin yeni nəzarətsiz keçidlərinin qarşısının alınması üçün tədbirlərin görülməsi tələb olunub.

Kübra Musayeva