Hörmüz böhranı fonunda dünya hərəkətə keçdi: 40 ölkə birləşdi
İtaliya, Xorvatiya və təxminən 40 ölkə, eləcə də beynəlxalq təşkilatlarla birlikdə Hörmüz boğazı ətrafındakı qeyri-sabitliklə bağlı yaranan fasilələr fonunda qlobal ərzaq tədarükü zəncirlərini gücləndirmək məqsədi daşıyan "Gübrəyə Çıxış və Ərzaq Təhlükəsizliyi üzrə Roma Koalisiyası"nı təsis edib.
TodayPress TV xəbər verir ki, təşəbbüs İtaliyanın xarici işlər naziri Antonio Tayani və Xorvatiyanın xarici işlər naziri Qordan Qrliç-Radmanın həmsədrliyi ilə Romada keçirilən nazirlər toplantısından sonra elan edilib.
Görüşdə BMT-nin Ərzaq və Kənd Təsərrüfatı Təşkilatı (FAO) və digər beynəlxalq qurumlar da iştirak edib.
Həmsədrlərin birgə bəyanatında "Gübrəyə Çıxış və Ərzaq Təhlükəsizliyi üzrə Roma Koalisiyasının irəli aparılmasının vacibliyi barədə ortaq anlaşmanın" mövcud olduğu bildirilib. Onlar tədarük zəncirindəki boşluqları aradan qaldırmaq üçün koordinasiyalı beynəlxalq fəaliyyətin zəruriliyini vurğulayıblar.
Bəyanatda qeyd olunur ki, Yaxın Şərqdə və daha geniş Aralıq dənizi regionunda artan qeyri-sabitlik, o cümlədən Hörmüz boğazı ilə bağlı strateji marşrutlar və dəniz təhlükəsizliyindəki fasilələr qlobal ərzaq və gübrə tədarükü zəncirlərinə ciddi təzyiq göstərir. Bu təzyiqlərin xüsusilə Afrikada və Aralıq dənizi hövzəsində idxaldan asılı olan həssas ölkələr üçün ağır fəsadlar törətdiyi bildirilib.
İştirakçılar ərzaq təhlükəsizliyi, iqtisadi dözümlülük və regional sabitliyi möhkəmləndirmək üçün beynəlxalq səviyyədə koordinasiyanın gücləndirilməsi barədə razılığa gəliblər. Həmçinin tədarük zəncirlərinin şaxələndirilməsi, logistik əlaqələrin yaxşılaşdırılması və dözümlü aqrar-sənaye sistemlərinə investisiyaların artırılmasına çağırış edilib.
İtaliya XİN-in məlumatına görə, təşəbbüs istehsalçı, tranzit və idxalçı ölkələr arasında əməkdaşlıq üçün inklüziv platforma kimi hazırlanıb. Məqsəd tədarük axınlarının davamlılığını təmin etmək və gübrələrə çıxışı yaxşılaşdırmaqdır.
Aysel Mətləb
