Braziliya mal əti istehsalında ABŞ-ni geridə qoyacaq
Analitiklərin proqnozlarına görə, Braziliya 2025-ci ilə qədər dünyanın ən böyük mal əti istehsalçısı kimi ABŞ-ni ötəcək.
TodayPress TV xəbər verir ki, bu barədə "Reuters" məlumat yayıb.
Braziliyada mal əti istehsalı 2025-ci ildə gözləntiləri üstələyərək təxminən 4% artacaq.
Əvvəllər istehsalda azalma proqnozlaşdıran Rabobank indi Braziliyada mal əti istehsalının 0,5% artaraq 12,5 milyon tona (diri çəkidə) çatacağını gözləyir. ABŞ Kənd Təsərrüfatı Nazirliyi də dekabr ayında Braziliya ilə bağlı proqnozunu 450 min ton artıraraq 12,35 milyon ton səviyyəsinə yüksəldib.
Fevral ayında açıqlanacaq rəsmi statistika bu rəqəmləri təsdiqlərsə, Braziliya ilk dəfə olaraq ABŞ-ni mal əti istehsalında geridə qoymuş olacaq. ABŞ Kənd Təsərrüfatı Nazirliyinin məlumatına əsasən, ABŞ-də mal əti istehsalı 2025-ci ildə 3,9% azalaraq 11,8 milyon ton təşkil edəcək.
Qeyd edək ki, Braziliya artıq dünyanın ən böyük mal əti ixracatçısıdır. Hökumət məlumatlarına görə, ölkənin mal əti ixracından əldə etdiyi gəlir 2025-ci ildə 17 milyard dollara yaxınlaşacaq.
Türkan İsgəndərli
