Avstraliyada şəhər satışa çıxarıldı
Dünyanın ən kiçik şəhərlərindən biri Avstraliyada satışa çıxarılıb. Hazırda cəmi iki nəfərin yaşadığı Kuladdi yaşayış məntəqəsi 400 000 Avstraliya dolları (təxminən 280 000 ABŞ dolları) dəyərində qiymətləndirilib.
TodayPress TV xəbər verir ki, bu barədə "Daily Mail" nəşri məlumat yayıb.
Kuladdi Brisbendən 800 kilometr qərbdə, Kvinslend ştatında yerləşir. Şəhərlə yanaşı, alıcı, həmçinin dördotaqlı evi olan yolkənarı kompleks, motel, mağaza, pab və dördulduzlu restoran əldə edəcək.
Hazırda şəhərdə Kerol Yarrou və Co Kornel yaşayırlar. 2023-cü ildə onlar yerli "Foxtrap Road House" kompleksini satın alıblar və üç il ərzində öz poçt indeksinə malik şəhərə yeni həyat verməyə ümid edirdilər. Lakin onların plan müddəti başa çatmaq üzrədir. Yarrou təqaüdə çıxmağa, Kornel isə köçməyə hazırlaşır. Nəticədə şəhər satışa çıxarılıb.
Keçmişdə Kuladdi nəhəng dəmir yolu qovşağı olub. İnkişafının pik dövründə burada təxminən 270 nəfər yaşayıb, məktəb, qəssab dükanı və polis bölməsi fəaliyyət göstərib. Şəhərin tənəzzülü dəmir yolu xəttinin 1917-ci ildə başqa bir yaşayış məntəqəsinə qədər uzadılmasından sonra başlayıb. 1967-ci ildə sərnişin daşınması dayandırıldıqdan sonra sakinlər kütləvi şəkildə buranı tərk etməyə başlayıblar, yerli iqtisadiyyat isə tənəzzülə uğrayıb.
Buna baxmayaraq, Kuladdi Avstraliyanın ucqar bölgələrindən keçən səyahətçilər üçün vacib dayanacaq yeri olaraq qalır. Yerli sakinlər qeyd edirlər ki, buraya müntəzəm olaraq şəhərin keçmiş sakinləri və turistlər gəlirlər. Burada həyatın özü isə sakitliyi və ölçülü ritmi ilə fərqlənir.
