"Amnesty International" Rusiyada arzuolunmaz elan edildi
Rusiya Baş Prokurorluğu “Amnesty International Limited” beynəlxalq qeyri-hökumət təşkilatının Rusiya Federasiyasındakı fəaliyyətini arzuolunmaz elan edib.
TodayPress TV xəbər verir ki, bu barədə "TASS"a nəzarət agentliyinin mətbuat xidməti məlumat verib.
“Rusiya Federasiyasının Baş Prokurorluğu Londonda qeydiyyatdan keçmiş “Amnesty International Limited” beynəlxalq qeyri-hökumət təşkilatının Rusiya Federasiyasının ərazisində fəaliyyətini arzuolunmaz hesab etmək barədə qərar qəbul edib” deyə məlumatda bildirilir.
Baş Prokurorluq izah edib ki, Ukrayna müharibəsi başlayan gündən "Amnesty International Limited" fəalları regionda hərbi qarşıdurmanı gücləndirmək üçün mümkün olan hər şeyi edirlər.
“Təşkilatın üzvləri ekstremist təşkilatları dəstəkləyir və xarici agentlərin fəaliyyətini maliyyələşdirir. Təşkilat özünü dünyada insan hüquqlarının müdafiəsinin fəal dirijoru kimi təqdim edir, amma əslində "Amnesty International Limited"in Londondakı baş ofisi Kiyevin əlbirləri tərəfindən ödənilən qlobal rusofob layihələrin hazırlanması mərkəzidir" deyə idarədən bildirilib.
Töhfə Səməd
