U-17 sərbəst güləş üzrə millimiz Vətənə qayıtdı

Şimali Makedoniyanın paytaxtı Skopyedə keçirilən U-17 Avropa çempionatında birincilik qazanan sərbəst güləş üzrə millimiz Vətənə qayıdıb.

TodayPress TV xəbər verir ki, güləşçiləri gətirən təyyarə Heydər Əliyev Beynəlxalq Hava Limanına enib.

İdmançıları ictimaiyyət nümayəndələri, jurnalistlər və azarkeşlər qarşılayıblar.

Qeyd edək ki, Azərbaycanın yeniyetmələrdən ibarət sərbəst güləş millisi Avropa çempionu olub. Azərbaycan yığması qitə birinciliyində uğurlu cıxış edərək 6 medal qazanıb. Məsul yarışda 3 qızıl, 1 gümüş və 2 bürünc medal əldə edilib. Bu nəticə ilə 151 xal toplayan millimiz növbəti dəfə Avropa çempionu olub. Ukrayna 144 xalla ikinci, Gürcüstan isə 116 xalla üçüncü yeri tutub.

Böyük məşqçi Əsgərxan Novruzov, məşqçilər Vahid Məmmədovla Yaşar Əliyevin rəhbərliyi altında Rəvan Həsənzadə (48 kq), Ruslan Əlizadə (55 kq) və Səid Paşayev (92 kq) qızıl, Həsən Həsənov (60 kq) gümüş, Ramal Mirhüseynov (51 kq) və Hakim Tağıyev (110 kq) isə bürünc medal qazanıb.