Rassellin gələcəyi ilə bağlı gözlənilməz açıqlama
Rassell artıq “Mercedes”dən ayrılmağı düşünür.
TodayPress TV xəbər verir ki, “Formula 1”də “Haas” komandasının sabiq rəhbəri Günter Ştayner “Mercedes”in pilotu Corc Rassellin gələcəyi ilə bağlı fikirlərini bölüşüb.
Ştaynerin sözlərinə görə, bir çox pilot 2028-ci ildən etibarən “Audi” komandasına keçid variantını nəzərdən keçirir. O bildirib ki, komandanın növbəti mövsüm üçün heyəti böyük ehtimalla formalaşıb, lakin 2028-ci ildə yeni imkanlar yarana bilər.
“Düşünürəm ki, Corc da artıq digər variantlara baxır. Çünki indi onun komanda yoldaşı Kimi Antonellidir. O, karyerasının sonuna qədər Kimi ilə eyni komandada qalmaq istəmir. Belə olacağı halda, gələcək illərdə komandadakı mövqeyinin necə olacağını anlayır. Buna görə də yeni imkanlar axtarır”, – deyə Ştayner bildirib.
O əlavə edib ki, “Audi”nin inkişafı plan üzrə gedir və bu səbəbdən həmin komanda yaxın illərdə bir çox pilot üçün cəlbedici seçim ola bilər. Ştayner, həmçinin Karlos Saynsın da “Audi”yə keçmək istəyən sürücülər arasında olacağını düşündüyünü vurğulayıb.
Namiq HUN
