QALMAQALDAN SONRA ELVİNİN TALEYİ – KİM ONU İSTƏYİR?
Elvin Cəfərquliyev Azərbaycan futbolunun son illərdə yetişdirdiyi ən perspektivli sol cinah müdafiəçilərindən biridir. Sürəti, hücuma qoşulmaq bacarığı və avrokubok təcrübəsi onu bir çox klub üçün maraqlı fiqura çevirib. Hazırda Cəfərquliyevin bazar dəyəri təxminən 1 milyon avro civarında qiymətləndirilir və “Qarabağ” klubu ilə müqaviləsi 2027-ci ilə qədərdir.
Son aylarda Elvinin adı bir sıra xarici klublarla hallanıb. Türkiyədən “Fənərbağça” ilə bağlı iddialar yayılsa da, İstanbul təmsilçisi rəsmi marağı təkzib edib.
Daha əvvəl İtaliya və Mərkəzi Avropadan da maraq xəbərləri dolaşırdı. Mətbuatda İtaliyadan “Torino”, “Komo”, Polşadan “Lex Poznan” və Macarıstandan “Ferentsvaroş” kimi klubların adı çəkilib. Lakin bu komandaların əksəriyyəti rəsmi təklif etməyib.
AZƏRBAYCANDA HANSI KLUBLARA KEÇƏ BİLƏR?
Elvin Cəfərquliyev “Qarabağ”dan ayrılsa, ölkə daxilində onun üçün real variantlar çox deyil. Ən real seçimlər “Neftçi”, “Sabah” və “Zirə” klublarıdır.
“Neftçi” sol cinahı gücləndirmək üçün təcrübəli yerli oyunçu axtarışında ola bilər. “Sabah” – iddialı layihə və yüksək maaş təklif edə biləcək klubdur. “Zirə” isə Avrokubok perspektivi olarsa, maraqlı seçim ola bilər.
Amma reallıqda “Qarabağ” birbaşa rəqibə satış etmək istəməz.
ÖLKƏ XARİCİNDƏ HANSI KLUBLARDA OYNAYA BİLƏR?
Elvinin oyun üslubu ən çox Türkiyə, Polşa və Macarıstan liqalarına uyğundur.
Cəfərquliyev Türkiyə Super Liqasında - “Trabzonspor”, “Samsunspor”, “Konyaspor”, Polşa Ekstraklasasında - “Lex Poznan”, “Rakov”, Macarıstanda isə “Ferentsvaroş” kimi klublarda baxımlı performansı ilə adından söz etdirə bilər.
Belçika və ya Niderlandın sürətli, hücumameyilli cinah müdafiəçilərinə ehtiyac duyan orta səviyyəli klubları da Elvini qeydiyyatdan keçirə bilərlər.
Əgər intizam problemi olmasaydı, Elvin üçün daha yüksək səviyyəli transfer mümkün görünürdü. Çünki onun Çempionlar Liqası və Avropa Liqası təcrübəsi var. Ancaq hazırkı qalmaqal bəzi klubları ehtiyatlı davranmağa vadar edə bilər.
FUTBOLÇUYA GƏLƏN TƏKLİF VƏ PERSPEKTİV
Hazırkı durumda Cəfərquliyev üçün rəsmi, yüksək məbləğli təklifin olub-olmaması bilinmir. “Qarabağ”ın ona yeni müqavilə və maaş artımı təklif etdiyi barədə də xəbərlər yayılıb.
Əgər yayda transfer pəncərəsində özünü toparlayıb peşəkar davranış nümayiş etdirsə, onun üçün 1–2 milyon avro civarında transfer mümkündür. Əks halda, ya “Qarabağ”da qalacaq, ya da daha aşağı səviyyəli liqaya keçəcək.
Namiq HUN
