NHL-də yeni ulduz parlayır – Bedard tarixə düşdü
Konnor Bedard ABŞ Milli Xokkey Liqasında (NHL) çıxış edən “Çikaqo Blekhoks” tarixində rekord müəyyənləşdirib.
TodayPress TV xəbər verir ki, gənc hücumçu bu uğura “San-Xose Şarks” ilə keçirilən səfər oyununda nail olub. Matç “Çikaqo”nun 2:3 hesablı məğlubiyyəti ilə başa çatıb.
Görüşün ikinci hissəsində məhsuldar ötürmə ilə yadda qalan Bedard NHL-də 200-cü xalını (75 qol + 125 assist) qazanıb. O, bu göstəriciyə 215 oyunda çatıb.
20 yaşlı forvard “Blekhoks” tarixində 21 yaşdan əvvəl bu həddə çatan ilk xokkeyçi olub. Eyni zamanda, o, NHL tarixində bu uğura imza atan 13-cü oyunçu kimi tarixə düşüb.
Cari mövsümdə Konnor Bedard 64 oyunda 30 qol və 41 məhsuldar ötürmə ilə yadda qalıb.
Namiq HUN
