“Mançester Siti”də Qvardiola sonrası plan müəyyənləşir
“Маnçester Siti” klubunun baş məşqçisi vəzifəsinə əsas namizəd müəyyənləşib.
TodayPress TV xəbər verir ki, bu barədə italiyalı insayder Fabritsio Romano məlumat yayıb.
Mənbənin iddiasına görə, Enzо Mareska “Mançester Siti” komandasının baş məşqçi postuna əsas və faktiki olaraq yeganə namizəd hesab olunur. Bu variant Xosep Qvardiola klubdan ayrılacağı halda reallaşa bilər.
Bildirilir ki, yekun qərarı məhz Qvardiola özü verməlidir və hadisələrin sonrakı inkişafı onun seçimindən asılı olacaq.
Qeyd edək ki, Mareska bu ilin yanvarında “Çelsi” klubundan ayrılıb. İtaliyalı mütəxəssis daha əvvəl də Qvardiolanın rəhbərliyi altında “Mançester Siti”nin məşqçilər korpusunda çalışıb.
Xatırladaq ki, bir sıra mənbələr Qvardiolanın mövsümün sonunda komandadan ayrılacağını yazsa da, ispaniyalı mütəxəssis bu xəbərləri şərh etməkdən imtina edib.
Namiq HUN
