FIA rəhbəri: “Biz populyarlıq üçün çalışmırıq”
Məhəmməd ben Sulayem Beynəlxalq Avtomobil Federasiyasının (FIA) missiyası və “Formula-1” yarışlarındakı rolu barədə danışıb.
TodayPress TV “Forbes”a istinadən xəbər verir ki, FIA prezidenti federasiyanın əsas məqsədinin idmanda ədaləti qorumaq olduğunu bildirib.
“Əsas məsələ hər şeyin düzgün qaydada getməsinə nəzarət etməkdir. Formula One Management (FOM) kommersiya tərəfini idarə edir, FIA isə texniki və idarəedici tərəfi təmsil edir. Bütün çempionatların sahibi məhz FIA-dır”, - deyə Ben Sulayem bildirib.
O qeyd edib ki, yarışların təşkili üçün promouter lazımdır və FOM bu sahədə etibarlı tərəfdaş kimi fəaliyyət göstərir.
FIA rəhbərinin sözlərinə görə, federasiyanın işi bütün iştirakçılara qarşı ədalətli olmaq və idmanın maraqlarını qorumaqdır.
“Bu, çox çətin missiyadır. FIA-nın heç vaxt azarkeşləri olmayacaq. Çünki insanlar müəyyən komandanı və ya pilotu dəstəkləyirlər. Məsələn, stüardlar beş saniyəlik cərimə verəndə azarkeşlər qəzəblənirlər”, - deyə o vurğulayıb.
Ben Sulayem əlavə edib ki, FIA-nın məqsədi populyarlıq qazanmaq deyil, yarışlarda hamı üçün bərabər və ədalətli qərarların qəbul edilməsini təmin etməkdir.
Namiq HUN
